16 март куни Ўзбекистон президенти Шавкат Мирзиёев Қозоғистон президенти Қасим-Жомарт Тоқаев билан телефон орқали мулоқот қилди.
Давлатимиз раҳбари Қозоғистон етакчисини янги таҳрирдаги Конституция лойиҳаси бўйича референдум муваффақиятли ўтказилгани билан самимий табриклади. Қайд этилишича, қабул қилинган янгиланишлар мамлакатнинг барқарор ривожланиши ҳамда халқаро нуфузини мустаҳкамлашга хизмат қилади.
Суҳбат давомида Ўзбекистон–Қозоғистон стратегик шериклик ва иттифоқчилик муносабатларини янада мустаҳкамлаш масалалари ҳам кўриб чиқилди. Томонлар савдо-иқтисодий, инвестициявий, транспорт, маданий-гуманитар ва бошқа устувор йўналишларда қўшма лойиҳа ва дастурларни илгари суришга алоҳида эътибор қаратди.
Етакчилар, шунингдек, халқаро ва минтақавий аҳамиятга эга долзарб масалалар юзасидан фикр алмашиб, бўлажак икки ва кўп томонлама тадбирлар режасини муҳокама қилди. Суҳбат якунида давлат раҳбарлари икки мамлакат халқларини яқинлашиб келаётган Рамазон ҳайити ва Наврўз байрами билан табриклаб, тинчлик-осойишталик ҳамда фаровонлик тилади.
