Соҳибқирон Амир Темур таваллудининг 690 йиллиги муносабати билан 11–13 апрель кунлари ўтказилаётган фестивал доирасида “Амир Темур ва темурийлар даври либослари” кўргазмаси ҳам ташкил этилмоқда.
Тадбирда мамлакат бўйлаб 25 та театр иштирок этмоқда. Улар орасида Қашқадарё вилояти мусиқали драма театри, Қўқон шаҳар мусиқали драма театри, Каттақўрғон шаҳар драма театри, Сурхондарё вилояти мусиқали драма театри, Қорақалпоғистон давлат академик мусиқали театри ҳамда Наманган вилояти мусиқали драма театрининг турли спектакллари намойиш этилмоқда.
Фестивал Қашқадарё вилояти театрининг “Оқсарой” спектакли билан бошланди. Шундан сўнг “Амир Темур ва темурийлар даври либослари” номли тантанали юриш Бибихоним мадрасасидан Регистон майдони орқали Самарқанд мусиқали драма театригача ўтказилди.
Очилиш маросимида маданият вазирининг биринчи ўринбосари Авазхон Таджиханов сўзга чиқиб, Темурийлар даврининг тарихий ва маънавий аҳамияти ҳақида тўхталди.
Фестивал дастури доирасида турли театрларда спектакллар намойиши ҳамда либослар кўргазмаси ўтказилиши режалаштирилган. Якунда ғолиблар турли номинациялар бўйича тақдирланади.
Ушбу нуфузли санъат байрами Муҳтарам Президентимиз Шавкат Миромонович Мирзиёевнинг 2026-йил 5-февралдаги “Амир Темур таваллудининг 690 йиллигини кенг нишонлаш тўғрисида”ги ПҚ–46-сонли қарори ижроси доирасида ташкил этилмоқда. Мазкур тарихий ҳужжат нафақат юбилей тадбирларининг режасини, балки миллий давлатчилигимиз пойдеворини мустаҳкамлаш, аждодлар меросини янги давр талаблари асосида англаш ва уни келажак авлодларга етказишнинг стратегик йўналишларини белгилаб берди.
