Франция Президенти Эммануэль Макрон Арманистонга ташрифи чоғида кутилмаган “мусиқа кечаси”нинг бош қаҳрамонига айланди. У Никол Пашинян билан бир саҳнада машҳур қўшиқни жўрликда куйлаб, ижтимоий тармоқларда катта шов-шувга сабаб бўлди.
Кеча, 4 май куни Ереванда ўтган давлат зиёфати давомида сиёсатчилар La Bohème’ни ижро этган. Лавҳаларни “Franceinfo” телеканали эълон қилди.
Видео кадрларида Макрон микрофон билан рояль ёнида ўтиргани, мусиқа асбобини эса арманистонлик мусиқачи Ваагн Айрапетян чалаётгани кўринади. Шу пайт Пашинян барабан орқали жўр бўлиб, “сахнадаги трио”ни тўлдирган.
Тадбир иштирокчилари эса бу ноодатий чиқишни телефонларига суратга олиб, ижтимоий тармоқларга жойлаштирган. Арманистон Президенти Ваагн Хачатурян ҳам воқеани табассум билан кузатган.
Маълумот учун, ушбу кулиш ва қўшиққа бой кеча Европа сиёсий ҳамжамияти саммити доирасида ўтказилган. Тадбирда 50 дан ортиқ давлат делегациялари иштирок этмоқда.
