Испаниянинг Андалусия автоном ҳудудидаги Альмерия вилоятига қарашли Лос-Гальярдос туманида юз берган йирик ўрмон ёнғини оқибатида камида 11 киши ҳалок бўлди. Бу ҳақда мамлакат расмийлари маълум қилди.
Маълум қилинишича, қурбонларнинг тўрт нафари аланга ичида қолиб кетган автомобилда ҳалок бўлган. Яна етти киши эса расмий эвакуация йўналишидан чиқиб, қуриб қолган дарё ўзани орқали қочишга уринган вақтда ҳаётдан кўз юмган. Дастлабки маълумотларга кўра, ҳалок бўлганларнинг аксарияти чет эл фуқаролари бўлиши мумкин.
Андалусия ҳукумати вакили Антонио Санс мазкур фожиани минтақа тарихидаги энг кўп қурбон келтирган ўрмон ёнғини деб атади. Унинг сўзларига кўра, кучли шамол ва юқори ҳарорат таъсирида ёнғин жуда тез тарқалгани қутқарув ишларини анча қийинлаштирган. Айрим ҳудудларда аҳоли зудлик билан эвакуация қилинган бўлса, хавф юқори бўлган бошқа жойларда фуқароларга хавфсизлик нуқтаи назаридан уйларини тарк этмаслик тавсия қилинган.
Ҳодиса муносабати билан фавқулодда ҳолатнинг иккинчи даражаси эълон қилинган. Ёнғинни бартараф этиш ишларига Испаниянинг Ҳарбий фавқулодда вазиятлар бўлинмаси, 150 нафардан ортиқ мутахассис, ўнлаб ёнғин ўчириш гуруҳлари ҳамда махсус техника жалб этилган.
Табиий офат оқибатида қарийб минг нафар аҳоли хавфсиз ҳудудларга кўчирилиб, вақтинча спорт мажмуаларига жойлаштирилди. Бир аёл оғир куйиш жароҳатлари билан шифохонага ётқизилган, яна бир киши тутундан заҳарланган.
Шунингдек, бир неча фуқарога воқеа жойида тиббий ёрдам кўрсатилган.
Дастлабки тахминларга кўра, ёнғинга электр узатиш тармоғидаги носозлик сабаб бўлган бўлиши мумкин. Кучли шамол ва қуруқ об-ҳаво аланганинг қисқа вақт ичида катта ҳудудга тарқалишига олиб келган.
Ёнғин туфайли N-340A ва AL-6109 автомобиль йўллари вақтинча ёпилди. Кейинроқ эса A-7 автомагистралида транспорт ҳаракати қайта тикланган.
Шу билан бирга, Андалусиянинг Малага вилоятидаги Бенаавис ҳудудида ҳам яна бир ўрмон ёнғини қайд этилди. Эҳтиёт чораси сифатида қарийб минг нафар аҳоли эвакуация қилинган. Ҳозирда ёнғинни ўчириш ишлари давом этмоқда.
