Ҳокимлик матбуот хизмати маълум қилишича, фавқулодда ҳолатнинг асосий сабаби суғориш тармоқларининг ўзбошимчалик билан тўсиб қўйилгани бўлган. Бу эса сувнинг нормал оқиб кетишига тўсқинлик қилган.
Қайд этилишича, автотураргоҳлар, гаражлар ва йўллар каби рухсатсиз қурилган иншоотлар аввал узлуксиз ишлаб келган суғориш тизимининг фаолиятига жиддий таъсир кўрсатган. Илгари мазкур тармоқлар сувни чиқариб ташлаш ва ҳудудда сув тошқинларининг олдини олиш вазифасини самарали бажарган, аммо шаҳарнинг ривожланиши ва ноқонуний қурилишлар сабаб вазият ўзгарган.
Таъкидланишича, пойтахт дренаж тизими дастлаб кунига 20 миллиметр ёғингарчиликка мўлжалланган. Кеча икки соат давомида ёққан ёмғир 12 миллиметр ёғингарчилик олиб келган ва одатда бу муаммо туғдирмаслиги керак эди. Бироқ суғориш тармоқлари ёпилгани сабаб сув чиқиб кета олмай, сув тошқини юзага келган.
Маълум қилинишича, шаҳар дренаж тизимини янада кучли ёғингарчиликларга мослаштириш учун янги мастер-режа ишлаб чиқилган. Янги тизим кунига 36 миллиметргача ёмғир сувини қайта ишлашга мўлжалланган бўлиб, келгусида бундай ҳолатларнинг олдини олишга қаратилган.
Ҳозирда ҳодиса жойида махсус техника ишламоқда. Суғориш тармоқларини тиклаш ва кенгайтириш ишлари олиб борилмоқда, шунингдек, канализацияни яхшилаш ва сув тошқинларининг олдини олиш мақсадида янги тармоқлар қурилиши режалаштирилган.
