Бабаян ва Бикмаев мухлислардан стадионга келиб, қўллаб-қувватлашларини сўрашди

ЖЧ–2018 турнирига саралаш босқичи “А” гуруҳи 7-туридан ўрин олган Ўзбекистон – Қатар учрашувидан олдин ўтказилган матбуот анжуманининг биринчи қисмида Ўзбекистон терма жамоаси бош мураббийи Самвел Бабаян ва ярим ҳимоячи Марат Бикмаев иштирок этди.

“Малайзияда қайд этилган натижа учун мухлислар олдида узр сўрайман. Деярли барча ўйинлар ғалаба ва мағлубият орасида туради. Сурия билан ўйинда қаердадир мен хато ҳам қилгандирман. Йигитлар охиригача курашди, аммо сўнгги дақиқаларда ўтказиб юборилган гол барчасини ҳал қилди.

Афсуски, ҳеч қайси ўйинда оптимал таркибда ўйнай олмаяпмиз. Аввалги ўйинларда йўқотишлар бўлди. Денисов эртага майдонга туша олмайди. Бундан афсусдамиз. Тўхтахўжаев эса сариқ карточкалари тўпланиб қолгани туфайли ўйинни қўйиб юборади.

Бу гуруҳда кураш сўнгги тургача давом этади, чунки рақиблар ҳам очко йўқотмоқда. Асосий мақсадимиз — эратага ғалаба қозониш ва шу йўл орқали ЖЧ–2018 турнирига йўл олиш. Айни вақтда энг кучли таркибга эга эканимиз ҳақидаги сўзлардан қочмайман. Бу ҳақиқатдан ҳам шундай. Балки эртага ҳам истеъфога чиқарман. Асосийси, Ўзбекистон терма жамоаси ЖЧ–2018 турнирига йўл олиши керак.

Жамоа яхши ўйнаганда стадион тўлади. Мухлисларга мурожаат қилмоқчиман: стадионга қанча мухлис келишидан қатъи назар, улардан далда сўраб қоламиз ва бизни қўллаб-қувватлашларига умид қилмамиз”, – деди Самвел Бабаян.

“Сурияга қарши ўйиндан кейин ўзимизга келиб олдик ва эртага ғалаба учун барча кучимизни беришга тайёрмиз. Мухлисларни стадионга келиб, қўллаб-қувватлашларини сўраймиз”, – деди Марат Бикмаев.

Қайд этиш керакки, Сурияга қарши (0:1) ўйиндан кейин аксарият ўзбекистонлик ишбиқозлар ижтимоий тармоқлар орқали мухлисларни стадионга бормасликка чақириб, шу тариқа терма жамоа бош мураббийига бойкот эълон қилганди.

Эслатиб ўтамиз, Ўзбекистон – Қатар учрашуви эртага, 28 март куни Тошкентдаги “Бунёдкор” стадионида ўтказилади. Ўйин 18:00 да старт олиши режалаштирилган.