Россиялик машҳур пранкерлар Алексей Столяров (Лексус) ва Владимир Кузнецов (Вован)лар бу сафар Европа узатиш иттифоқи бош директори Ингрид Дельтенрени чув туширди. Унинг сўзларига қараганда, Евровидение Киевдан Берлинга кўчирилади, деб хабар берди Tvzvezda.ru нашри.
Пранкерлар Украина бош вазири Владимир Гройсман номидан қўнғироқ қилиб, иттифоқда россиялик хонанда Юлия Самойлованинг мамлакат ҳудудига кириши тақиқлангани учун Украинани жазолаш масаласи кўрилаётгани рост ёки ёлғонлигини билиш тўғрисида савол билан мурожаат қилди. Дельтенре россиялик хонанданинг тарафини олди.
“Танлов ўтказилиши кўзда тутилган ҳар бир мамлакат Евровидение қонун-қоидаларига риоя этиши лозим, юқоридаги ҳолатда қонун бузилмоқда. Биринчидан, Самойлова Қримда бўлганда, Евровидение вакили ҳисобланмаган. Иккинчидан, танловда иштирок этиб бўлгандан кейин Украина ҳукумати унга нисбатан яна тақиқни қўллаши мумкин”, деди Дельтенре.
У Киевнинг халқаро танлов ўтказиш ҳуқуқидан маҳрум бўлиши, танлов Берлинга кўчирилиши мумкинлигини таъкидлади.
Эслатиб ўтамиз, 22 март куни Украина ҳукумати россиялик хонанда Юлия Самойлованинг мамлакат ҳудудига киришини тақиқлаб, уни “қора рўйхат”га киритган эди. Бунга унинг 2015 йилнинг ёзида Қримдаги концертда иштирок этгани сабаб қилиб кўрсатилган.
