Ўзини табиб қилиб кўрсатган бухоролик тракторчи 500 минг доллар ишлаб топди

Бухоро вилояти Олот тумани Буржоқ қишлоғида тракторчи сифатида фаолият юритган Қаҳрамон Пўлатов тезда бойиб кетиш илинжида фирибгарликка қўл урди. Бу ҳақда Ўзбекистон бош прокуратурасининг “Ҳуқуқ” нашри хабар бермоқда.

Қаҳрамон Пўлатов қозоғистонлик таниши ёрдамида Бутунжаҳон психологлари, шифокорлари ва халқ табобати уюшмаси аъзосининг сохта сертификати, Қозоғистон соғлиқни сақлаш вазирлиги томонидан берилган бошқа диплом ва гувоҳномаларни қўлга киритган. Мазкур сохта ҳужжатлар ёрдамида Пўлатов ўзининг жиноий фаолиятига рафиқаси, ўғли, қизи ва бир неча ҳамшираларни жалб қилган.

“Қўли енгил табиб” ҳақидаги миш-мишлар бутун вилоятга, ҳатто қўшни Туркманистон ва Қозоғистонга ҳам тарқалди. “Табиб” бир кунда 130 нафар беморни қабул қилар, уларнинг ҳар биридан 10 минг сўм пул олар эди.

2016 йилда Пўлатов “Пўлатов Қаҳрамон Зиёнур” хусусий ташкилотига асос солди. Турли хилдаги маҳсулотларни касса аппаратисиз сотиш орқали Пўлатов 131 миллион сўм ишлаб топди. Шу тарзда, 2012-2015 йилларда “табиб” оиласи 1 млрд 872 минг сўм миқдорида даромад топди. Ноқонуний йўл билан топилган пуллар эвазига Қаҳрамон Пўлатов “Нексия”, “Спарк”, “Ласетти”, “Дамас” ва “ТТЗ-80-11” тракторини ҳамда 76 миллион 300 минг сўмга 54 бош қорамол сотиб олди.

Жиноят ишлари бўйича Бухоро вилояти суди қарорига кўра, Қаҳрамон Пўлатов энг кам ойлик иш ҳақининг 150 баравари миқдорида жарима тўлаши керак бўлади. Шунингдек, у саккиз йилга озодликдан маҳрум қилинди.