Бола организмида кальций меъёрда бўлиши учун

Шифокорлар болани икки ёшгача эмизиш кальций етишмовчилигининг олдини олади дейишади. Эмизикли болалар мутахассис кўрсатмаси билан D витаминини профилактика сифатида қабул қилишлари мумкин.

Кальций сут маҳсулотлари, хусусан, қатиқ, творог, пишлоқ, бринзада бисёр. Фарзандингизнинг ёшига мослаб, ушбу маҳсулотларни керакли миқдорда ва тартиб билан беринг.

Имкон қадар кўпроқ сабзавот ва меваларга ихтиёр беринг. Карам, бодринг, олма жуда фойдали.

Ҳафтада бир марта балиқли кун ташкиллаштиринг. Болаларга асосан суяксиз (филе) ва ёғсиз балиқлар тавсия этилади.

Миқдорини оширмаган ҳолда ва боланинг ёшига мослаб, қайнатилган тухум сариғини беришингиз мумкин. Кичик ёшдаги болакайларга қайнатилган тухумни санчқида эзғилаб едирган маъқул.

Об-ҳавога қараб, фарзандингиз билан эрталабки қуёш нурида сайр қилинг. Бу ҳам кальций профилактикаси ҳисобланади.

Жисмоний машқлар, сузиш, югуришга жалб этинг. Европалик олимлар «кенгуру» каби сакраш усулини тавсия этишади. Маълум бўлишича, мазкур ҳолатда бола бутун танаси билан ҳаракатланганда ҳам жисмоний, ҳам ақлий фаоллиги ортар экан.