Пойтахтимизда «Болажонлар-ширинтойлар» болалар мода фестивали бошланди.
“Осиё рамзи” Ўзбекистон дизайнерлар ва модельерлар уюшмаси ташаббуси билан ташкил этилган фестивалда маҳоратли ижодкорлар, ёш дизайнерлар, болалар ижодиёти марказлари, мамлакатимиздаги қатор мода мактабларининг вакиллари қатнашмоқда, деб ёзади ЎзА.
– Фестивалнинг биринчи кунида мамлакатимизнинг кийим-кечак тайёрлашга ихтисослашган етакчи корхоналари болалар ва ўсмирларга мўлжалланган, замонавий тенденция ва миллий анъаналаримизни ўзида мужассам этган ранг-баранг ва бежирим либослар коллекциясини кенг омма эътиборига ҳавола этмоқда, – дейди «Осиё рамзи» Ўзбекистон дизайнерлар ва модельерлар уюшмаси бошқаруви раиси Ҳолида Комилова. – Бу эса 18 йилдан буён ўтказиб келинаётган фестиваль тарихидаги ўзига хос янгилик бўлиб, Президентимиз Шавкат Мирзиёевнинг 2016 йил 21 декабрдаги «2017-2019 йилларда тўқимачилик ва тикув-трикотаж саноатини янада ривожлантириш чора-тадбирлари дастури тўғрисида»ги қарори доирасида олиб борилаётган тизимли ишлар маҳсулидир.
Халқаро болаларни ҳимоя қилиш кунига қадар давом этадиган фестивалда қатор тадбирларни ўтказиш режалаштирилган. Уларда мамлакатимиз дизайнерлари яратган 450 янги кийим-бош тўплами ҳавола этилади. Янги либос намуналарини «Тантана», «Fashion Lab» ижодий студиялари, «Колибри» арт-бюроси ва «Олтин қанот» мактабининг 2,5 ёшдан 13 ёшгача бўлган 220 нафар ёш модельери намойиш этади.
