1962 йилда Мэрилин Монро вафот этган уй 7,2 миллион долларга сотилди, деб хабар берди Lenta.ru нашри.
Мазкур ҳашаматли, умумий майдони 800 квадрат метр бўлган уй АҚШнинг Калифорния штатидаги Брентвуд шаҳрида жойлашган. Бу Мэрилинга тегишли бўлган ягона уйдир. Актриса тириклигида бу уйга журналистларни киритмаган, уларнинг бинони суратга туширишларига йўл қўймаган. “Менинг қандай, қаерда яшашимни, диваним ёки каминим қанақалигини ҳамманинг билиши шарт эмас”, деган эди Мэрилин Монро.
Уйни сўнгги эгаси 2012 йилда 3,5 миллион долларга сотиб олган бўлса-да, бу ерда ҳеч ким яшамаган. Ҳозирча уни ким сотиб олгани, унинг исми-шарифи маълум қилинмади. Бино 1929 йилда Санта-Моника тоғи этагида қурилган. Мэрилин Монро уни 1961 йилда 80 минг долларга сотиб олган. Уй ўтган йилнинг апрель ойида сотувга қўйилган. Мэрилин Монро 36 ёшда, 1962 йилнинг 4 августидан 5 августига ўтар кечаси кўп миқдорда уйқу дориси ичиши оқибатида вафот этган. У Вествуд қабристонига дафн этилган.
