Италиянинг Турин шаҳрида Чемпионлар лигаси финали вақтида мингдан ортиқ киши жабрланди, деб хабар берди Vesti.ru нашри.
3 июнь, шанба куни Туриннинг Сан-Карло майдонига "Ювентус" – "Реал" футбол матчини катта экранда томоша қилиш учун 20 мингдан ортиқ одам йиғилган. “Реал” томонидан урилган учинчи голдан кейин оломон орасида саросима бошланган.
Ўйин вақтида ўзларини худкуш-террорчи қилиб кўрсатиб, одамларни ваҳимага солмоқчи бўлган ўсмирларнинг хатти-ҳаракатидан кейин тўполон бошланган. Одамлар қочишга ҳаракат қилгани боис юзага келган тиқилинч оқибатида 1500 га яқин одам жабрланган. Айни вақтда улардан 3 кишининг, шу жумладан 7 ёшли бола оғир аҳволда касалхонага ётқизилган.
Кузатув камералари видеоёзувининг таҳлилидан сўнг полиция тўполон кўтарилишига сабаб бўлган икки ёш йигитни аниқлади. Улардан бири қўлини юқорига кўтариб, қичқиргандан кейин одамлар қоча бошлаган ва оқибатда тиқилинч юзага келган. Чемпионлар лигаси финалида “Ювентус” 1:4 ҳисобида “Реал”га ютқазди.
