Марҳум боксчи Муҳаммад Алининг 45 ёшли ўғли яқин кунларда уйсиз-жойсиз дайдига айланиши мумкинлигини маълум қилди, деб хабар берди Vesti.ru нашри.
Унинг сўзларига қараганда, машҳур отасидан жуда ҳам кам мерос қолган. Кичик Муҳаммад Али дўстларининг уйида яшайди. Рафиқаси унинг қашшоқлигидан чарчаб, ташлаб кетган.
Боксчи Муҳаммад Али 2016 йилнинг 3 июнь куни вафот этган эди. Ўғлининг айтишича, отасидан қолган 62 миллион доллар мероснинг ҳаммасига қариндошлари эгалик қилган, унга эса “бор-йўғи 6 минг” доллар теккан. Айни пайтда кичик Муҳаммад Али Флоридадаги дўстининг уйида полда ётиб, кун кечирмоқда, егулик олишга пули йўқ. Отасидан ўғлига ҳеч қандай мерос қолмаганлигини билган рафиқаси икки фарзандини олиб, уни ташлаб кетган. Кичик Муҳаммад Али ижарага олган уйнинг сув ва электроэнергияси ҳақини тўлай олмагани учун ўчириб қўйилган.
Боксчининг ўғли қариндошларини судга бериш билан қўрқитиб, мазкур масалада журналистлардан ёрдам сўради. Кичик Муҳаммад Али отасининг меросига даъвогар бўлган ягона инсон эмас. Марҳум боксчининг 73 ёшли акаси Раҳмон ҳам унга бир цент тегмаганлигидан нолиди.
