Қулупнай
Унинг таркибида калорий миқдори паст ҳисобланади. Ҳаттоки, қулупнайли парҳез ҳам мавжуд. Бундай парҳез натижасида тери ёшаради ва унга яхши таъсир қилади. Қулупнай витаминларга бойдир. Фойдали экан деб, меъёридан ортиқ истеъмол қилиш ярамайди. Чунки аллергияси борларни безовта қилиши мумкин.
Олма
Олма қон таркибидаги холестерин миқдорини пасайтириш хусусиятига эга. Унинг пўстлоғи саратон касаллигини олдини олишда фойдали ҳисобланади. Олмани пўстлоғи билан ейишга ҳаракат қилинг. Бу тарзда истеъмол қилиш орқали организмга кверцетин ва витамин С киради.
Тарвуз
Тарвуз таркибида озиқ моддалар билан бирга В 1, В 2, С, РР витаминлари, каротин, қанд мавжуд. Улар организмда моддалар алмашинуви ва овқат ҳазм қилиш тизимини яхшилаш имконини беради. Иссиқ кунларда кўп миқдорда тарвуз ейиш орқали ортиқча вазн муаммосидан қутулиш мумкин.
Банан
Банан спортчиларнинг меваси ҳисобланади. Чунки у инсонга энергия бағишлаш хусусиятига эгадир. Спорт майдончасида бир ярим соат тинимсиз шуғулланиш учун иккита банан ейиш кифоя қилар экан. Буни тадқиқотлар кўрсатмоқда. Унинг таркибида В 6 витамини мавжуд бўлиб, у қондаги глюкоза миқдорини меъёрлаштириб, кайфиятни яхшилайди. Банан камқонликда ёрдам беради. Калий моддаси юрак фаолиятини ва организмдаги сув балансини яхшилайди.
Нок
Унинг таркибида кўп миқдорда қанд, фермент, микроэлементлар (мисол учун йод) ва В 1, Р, РР витаминлари мавжуд. Шу боис, нок шарбати тана аъзога фойдали ҳисобланади. Нок яраларни тез фурсатда битишига ёрдам беради. Ҳароратни тушириш хусусиятига ҳам эга. Нок таркибидаги калий юрак фаолиятини яхши ишлашини таъминлайди. Нок йод моддасига бой бўлиб, қон томирлари фаолиятини яхшиланишига ёрдам беради. Нок меваси ичак фаолиятини яхшилаб, бактерияларга қарши курашиш хусусиятига ҳам эга ҳисобланади.Унинг ҳиди қанча хушбўй бўлса, шунча фойдалидир.
Апельсин
Апельсин – С витаминига бой бўлиш билан бирга, клечаткага бой ҳисобланади. Бундан ташқари, апельсин таркибида холестерин миқдорини камайтириш, қондаги қанд моддасини пасайтириш хусусиятига эга бўлган пектин ва фойдали моддалар бор. Бу табиатнинг неъмати бўлиши апельсин айниқса, қандли диабет билан оғрувчи касалларга фойдали ҳисобланади.
Олхўри
Олхўри темир моддасига бойдир. Олхўри айниқса, жиғилдон қайнаганда, ичак фаолиятидаги кераксиз моддаларни чиқаришда ёрдам беради. Шу билан бирга, атеросклероз, бод (ревматизм) касаллигида фойдалидир.
Зиёда тайёрлади
