Австралия Миллий музейида сақланаётган динозаврлар қимматбаҳо моделларининг бошларини номаълум шахслар “танасидан жудо қилди”, деб хабар берди Ria.ru нашри.
Нашрнинг хабар беришича, динозаврлар экспозициянинг кўча қисмида турган. Уларнинг олдига бориш учун жиноятчилар баландлиги 1,2 метр бўлган девордан ошиб ўтишган. Полиция динозаврларнинг бошлари қўл арра ёрдамида кесилган, деб тахмин қилмоқда.
Воқеа шанба куни рўй берди. Айни пайтда динозаврларнинг бошлари ва жиноятчилар топилгани йўқ. Музей ходимларининг айтишича, музей бир неча минг доллар моддий зарар кўрган. Бу музей тарихида рўй берган тўртинчи жиноятдир. 2013 йилда ҳам экспозициянинг кўча қисмида жойлашган динозаврлар ўғирлаб кетилган эди.
