“Оскар” киномукофотининг лауреати Эмма Стоунни Forbes журнали жорий йилнинг энг қиммат ҳақ тўланадиган актрисаси, деб эълон қилди, дея хабар қилди Ntv.ru нашри.
Forbes журналининг хабар беришича, актриса “Ла-Ла-Ленд” мюзиклидаги асосий қаҳрамон аёл роли учун Эмма Стоунга 26 миллион доллар ҳақ тўланган. Бу унинг ижодий карьерасидаги энг юқори кўрсаткичдир.
Рўйхатнинг иккинчи ўрнини 25,5 миллион доллар билан Женнифер Энистон эгаллади. Эмма Стоундан фарқли равишда 48 ёшли актриса фильм прокатларидаги дивидентидан ташқари Emirates airlines, Smartwater, Aveeno, Living Proof компаниялари билан реклама шартномаларини тузган.
Америкалик Женнифер Лоуренс 24 миллион доллар билан ўтган йили эгаллаган биринчи ўриндан учинчи ўринга тушди. Кейинги ўринларни 18 миллион доллар билан Мелисса Маккарти, 15,5 миллион доллар билан Мила Кунис, 14 миллион доллар билан британиялик Эмма Уотсон ва ЖАРлик Шарлиз Теронлар эгаллашди.
