БИРИНЧИ ҚАВАТДА ЯШОВЧИЛАР ҲАМ ЛИФТ УЧУН ҲАҚ ТЎЛАЙДИМИ?
Уйимиздаги лифт бузилиб қолди. Мен биринчи қаватда яшайман. Лифтдан фойдаланмайман. Нега унинг учун ҳақ тўлашим керак? Бундан ташқари, мажбурий бадал таркибида лифтга хизмат кўрсатиш ҳақи инобатга олинган. Кўп квартирали уйларнинг биринчи қаватида яшовчилар учун бадални камайтириб бўлмайдими?
А.Чориқулова.
Фаррухжон Файзиев, ҳуқуқшунос:
— "Хусусий уй-жой мулкдорларининг ширкатлари тўғрисида"ги Қонуннинг 28-моддасида назарда тутилишича, кўп квартирали уйнинг шу жумладан лифтлари, лифтнинг шахталари ва бошқа шахталар умумий мол-мулк ҳисобланади.
Жой мулкдорлари умумий мол-мулкни сақлаш бўйича умумий харажатларни биргаликда зиммаларига олишлари шарт (Мазкур Қонуннинг 30-моддаси). Шу сабабли ҳатто лифтдан фойдаланмасангиз ҳам, уни сақлаш учун ҳақ тўлашингиз шарт.
