“ХУСУСИЙ ТАШКИЛОТДАН ДЕКРЕТ ПУЛИНИ ҚАНДАЙ ТАЛАБ ҚИЛАМАН?”
Хусусий ташкилотда меҳнат шартномаси асосида ишласа, декрет пули тўланадими? Буюджетида етарли маблағи бўла туриб, тўла олмаймиз, дейишлари ҳам мумкинми? Агар бюджетида етарли маблағи бўлса, декрет пулимни тўлашларини қайси қонун доирасида талаб этишим мумкин?
М.Эшимова, Қашқадарё вилояти, Қарши шаҳри
Б.НИЗОМОВ, Ўзбекистон Республикаси Бандлик ва меҳнат муносабатлари вазири ўринбосари:
— Ўзбекистон Республикаси Меҳнат кодексининг 233-моддасига асосан, аёлларга туққунга қадар етмиш календарь кун ва туққанидан кейин эллик олти календарь кун (туғиш қийин кечган ёки икки ва ундан ортиқ бола туғилган ҳолларда - етмиш календарь кун) муддати билан ҳомиладорлик ва туғиш таътиллари берилиб, давлат ижтимоий суғуртаси бўйича нафақа тўланади.
Ҳомиладорлик ва туғиш таътили жамланган ҳолда ҳисоблаб чиқилиб, туғишга қадар амалда бундай таътилнинг неча кунидан фойдаланилганидан қатъи назар аёлга тўлиқ берилади.
Ўзбекистон Республикаси Адлия вазирлигида 2002 йил 8 майда 1136-сон билан рўйхатга олинган Давлат ижтимоий суғуртаси бўйича нафақалар тайинлаш ва тўлаш тартиби тўғрисидаги Низомга асосан ҳомиладорлик ва туғиш бўйича нафақани тайинлаш ва тўлаш учун белгиланган тартибда берилган меҳнатга лаёқатсизлик варақаси асос бўлади.
Ҳомиладорлик ва туғиш бўйича (шу жумладан, ҳомила тушган ҳолларда) нафақа вақтинча меҳнатга лаёқатсизлик варақасида кўрсатилган барча давр учун тўланади.
Ҳомиладорлик ва туғиш бўйича (шу жумладан, ҳомила тушган ҳолларда) нафақа хусусий ташкилотлар томонидан тўлиқ тўланиши шарт. Ҳомиладорлик ва туғиш бўйича нафақа корхона томонидан тўланмаса, ҳуқуқни муҳофаза қилиш органларига ёки Давлат ҳуқуқ меҳнат инспекциясига мурожаат қилиш тавсия этилади.
