Ички ишлари вазирлиги Йўл ҳаракати хавфсизлиги бош бошқармаси матбуот хизматининг «SUG‘DIYONA» газетасига берган маълумотига кўра, Тошкент шаҳрида 2017 йилнинг 15 мартидан йўл ҳаракатини компьютерлашган бошқарув тизими жорий қилингач, сезиларли даражада йўл ҳаракати қоидабузарликлари камайган. Маълумки, Кузатув камералари 2 та қоидабузарликни автоматик тарзда аниқлайди: тезлик меъёрларига ва светофорнинг тақиқловчи ишорасига амал қилмай ҳаракатланиш. Тизим қоидабузарликларни аниқлай бошлаган 15 март куни 8 600 дан зиёд қоидабузарлик ҳақида хабар топилган бўлса, сенятбрнинг 10-санасида, яъни бир кунда 468 та қоидабузарлик тизим томонидан қайд этилган. Бу қоидабузарликлар сони анчагина камайганини кўрсатади. Кузатув камералари тест режимида ишга туширилганида хатоликлар кузатилди. Айни пайтда Тошкент шаҳрининг Миробод туманида жойлашган Тошкент шаҳар ИИББ ЙҲХБга қарашли 3-диагностика марказида алоҳида бўлинма кузатув камералари билан боғлиқ низоли вазиятларга ойдинлик киритиш мақсадида фаолият кўрсатяпти. Компьютерлаштирилган тизим томонидан чиқарилган жаримага тортиш тўғрисидаги қарор юзасидан бирор-бир тушунмовчилик бўлса, фуқаролар масалага ойдинлик киритиш мақсадида шу ерга мурожаат қилишлари мумкин.
Манба: “SUG‘DIYONA” газетаси
