"Даракчи" газетасининг "Қалтис савол" лойиҳаси меҳмони ёш бўлса-да, озми-кўпми ўз мухлисларига эга бўлишга улгурган, изланишдан тўхтамайдиган хонанда Улуғбек ХОЛИҚОВ...
Мусиқий лойиҳада иштирок этиб, ижодий имкониятларингизни синаб кўрдингиз. Хўш, ҳали нималарни эплолмас экансиз?
— Мусиқий лойиҳада иштирок этганимга тўрт йил бўлди, бу катта муддат. Ўша вақтда ёш эканлигим ва тажрибасизлигим ижодий жараёнда сезилган. Қўшиқ ёзиш, шеърини ёдлаш борасида ҳам тезкорликка тайёр эмаслигим панд берган. Хатоларимдан хулоса чиқарганман.
Улуғбек Холиқов, деганда “мусиқий лойиҳа ғолиби ва шоу хонандаси”, деган таърифни эшитамиз. Санъат таълимини олган ижодкор сифатида бу марралар сизни қониқтирадими, асли кўзлаган маррангиз қаергача?
— Мусиқий лойиҳадаги иштироким тасодиф бўлган. Танишим қўнғироқ қилиб, қатнашиб кўришимни айтганида, аввалига хоҳламаганман. Тақдир экан, лойиҳада иштирок этдим ва ғолиб бўлдим. Шоуга келсак, мен ишлайдиган телеканал клипларимни “айлантириб” беради, эвазига кўрсатувда хонандалик қиламан. Тўғри, мусиқа таълимини олган ижодкор учун булар етарлича чўққи эмас. Юқоридагилар илк одимлар, холос. Ҳали ижод қилиб, кўзлаган марраларимга эришишга имконим бор. Ниятим профессионал санъаткор бўлиш! Мухлислар қўшиқларимни қайта-қайта тингласа ва “зўр чиқибди, қойил!” деганининг ўзи мен учун катта ютуқ! Қаергача етиб боришимни эса вақт кўрсатади, лекин мен ижод қилишдан тўхтамайман.
Сизни ҳамкасбларингиздан ажратиб турадиган ўзига хос устун жиҳатингиз?
— Жавоб бериш қийин (ўйланиб). Устун жиҳатим, балки қўшиқларимнинг шеъри, мусиқа ва клипларимнинг ғоя муаллифи ва режиссёри ўзим эканлигим, тонгга қадар мусиқий сайқалчи билан бирга ишлашимдадир. Ижод қилганимда бор-йўғи тўртта мутахассис: мусиқий безакчи, тасвирчи, монтаж устаси, овоз операторининг ёрдами керак бўлади, холос.
Сизда ҳомий, истеъдод бор, лекин ижодда фаол эмаслигингизга нима сабаб, ҳатто бирор ҳамкасбингизга рақобатдошга айланишга ҳам улгурмадингиз?
— Продюсерлик маркази билан ўн ойгина ишладим, ҳозир эркин ижодкорман. Телеканалнинг кўмаги бор, холос. Ижодим сустлигининг боиси балки ҳозир ҳомийим йўқлиги ё ҳамма иш ўз бўйнимда эканидадир.Шунга қарамай, тўртта клип чиқаришга эришдим. Ҳатто охирги иккита клипимга ўзим режиссёрлик қилишимга тўғри келди. Ижодни бошлаганимга уч йилгина бўлди, ҳали ҳаммаси олдинда.
Сизнингча, бугун шоу-бизнес неча фоиз тадбиркорликка айланган ва қачон санъат ва тадбиркорлик бир-биридан тўла ажралади?
— Шоу-бизнес деярли тўлалигича тадбиркорликка айланган. Санъат учун ижод қиладиганлар бармоқ билан саноқли. Хонанданинг нони фақатгина тўйдан, шу боис мажбуран тўйбоп қўшиқ ёзади. Бирор қўшиқ “хит” бўлса, ҳамма хонанда худди шундай қўшиқ ижро этишни бошлайди. Эстрададаги бир хилликнинг сабаби ҳам шунда. Шукр, мухлислар профессионал санъаткор билан тадбиркор хонанданинг фарқига боряпти. Лекин санъат ва тадбиркорлик бир-биридан тўла ажралиши учун аниқ тизим ҳамда вақт керак.
“Журналистика соҳасида ўқимаса ҳам бўлади”, деган фикрда “му5” телеканалида телебошловчиликка қўл уриб, иқтидорингиз йўқлигини англадингизми ё иккита “қайиқнинг бошини тутиб”, сувга ғарқ бўлишингизни тушуниб етдингизми?
— Таклиф бўлганида, бошловчиликка ўзимда ҳам қизиқиш бўлган. Саҳна нутқи мукаммал бўлмаган ва сўз бойлиги кам одамдан талаб кучли бўлди. Шу боис лойиҳани тарк этишга қарор қилганман. Қолаверса, мухлислар ҳам ижодим ҳақида эмас, фақта уй қурилиши бўйича савол берадиган бўлиб қолишганди.
БИЛАСИЗМИ?
- Улуғбек Холиқов 1993 йилнинг 24 июлида Самарқанд шаҳрида туғилган.
- Ўзбекистон Давлат консерваториясига имтиёзли равишда қабул қилинган. 2016 йил эстрада хонандалиги факультетини тамомлаган.
- Оилада 2 та ўғилнинг тўнғичи.
Садоқат АЛЛАБЕРГАНОВА суҳбатлашди.
