КУЗ-ҚИШ МАВСУМДА КИЙИНИШНИНГ 5 ҚОИДАСИ

Латофатли бўлиш учун нима керак? Кўп пул?! Идеал қадди-қомат?! Ичига либослар сиғмаётганидан эшиклари ланг очиқтушаётган кийим жавоними? Йўқ ва яна бир бора йўқ! Аслида кийимларни ўзаро мутаносиб танлаш, худди овқат тайёрлаш, расм чизиш ёки мусиқа асбобини чалишдек гап. Аста-секинлик билан ва доимий равишда тажрибани орттириб, маҳоратни чархлаб бориш лозим. Айниқса, кийим танлай туриб энг кўп йўл қўйиладиган беш хатони ҳар бир аёл билиб қўйса, фойдадан ҳоли бўлмайди. Уларни дизайнер Дилноза МАҚСУДОВА санаб ўтади.

Сарвқомат қизлар болдирнинг ўртасигача узунликдаги этиклардан чиройли оёқларга урғу бериш учун фойдаланишади.Аммо тўладан келганлар бундай этикларга мурожжат қилмаганлари маъқул. Айниқса, қора этик билан бадан рангидаги капрон пайпоқ оёқни янада семиз кўрсатади ва атрофдагилар эътиборини айнан шу камчиликка қаратилишига сабаб бўлади. Узун қўнжли этик, этик рангидаги колготка ва шу рангдаги юбка ёрдамида оёқларни нақд 10 см.гача баланд кўрсатиш имкони бор. Калта қўнжли этикни эса шим билан кийган маъқул.

2-хато: “Водолазка” ҳар кимга ҳам тўғри келавермайди

Агар бўйнингиз оққушникидек узун бўлса, ёпишиб турувчи ёқали кофта (водолазка)лар айнан сиз учун яратилган. Аммо бўйни қисқа, кўкраги катта, елкалари кенг, юзи думалоқ ёки тўртбурчак шаклдаги аёллар бундай кийимлардан эҳтиёт бўлганлари маъқул. Чунки, “водолазка”лар бўйинни бекитиб, эътиборни кўкракка қаратади. Агар бўйнингиз узун бўлмаса яхшиси V шаклида ўйилган ёқали кўйлак ва кофталарга ихтиёр беринг. Қишнинг совуқ кунларида “водолазка”нинг ўрнига шарфдан фойдаланишни тавсия этмиз. Ахир тўғри танланган шарф тананинг юқори қисмини, шу жумладан бўйинни ҳам узунроқ кўрсатиш хусусиятига эга.

3-хато: Капрон пайпоқни пойабзалга мос эмаслиги

Сўнгги йилларда дўкон расталарини оч жигарранг (“загар” рангли) капрон пайпоқлар эгаллаб олди. Аммо оқ-сариқдан келган қизларга бундай рангдаги капрон пайпоқлар ярашмайди. Капрон пайпоқни кўлга кийиб кўриб, тана рангига қанчалик мос келишини осон билиб олиш мумкин. Кўпчилик аёллар капрон пайпоқларни айнан кўйлак рангига мослаб танлашга одатланган. Бироқ дизайнерлар пойабзал билан ранги мутаносиб капрон пайпоқ кийишни тавсия этишади. Бу билан аёлнинг бўйини баландроқ кўрсатиш мумкин. Шунингдек, расмли, гулли ёки нақшли капрон пайпоқларни гулсиз кўйлаклар билан кийган маъқул. Улар оёқни семиз кўрсатишини инобатга олиб қўйинг.

4-хато: “Қаламча” юбка ва “мокасин”туфли

“Қаламча” шаклидаги юбкани кийишнинг ўзига хос қоидалари мавжуд. Масалан, у қанча узун бўлса, туфлининг пошнаси ҳам шунча баланд бўлиши лозим. Қалин матодан тикилган классик “қаламча” юбкани юпқа ипак (шифон) ёки трикотаж кофта билан мослаштириш мумкин. Бўйи паст қизларга тиззадан узун “қаламча” шаклидаги юбкалар таъқиқланади, чунки у оёқларни калта кўрсатиб қўйиши мумкин. Агар бўйингиз паст бўлса-ю, “қаламча” юбка кийишни истасангиз,калтаро-ини – тизадан юыори турадиганини танланг. Шунингдек, бундай бичимдаги юбкани “мокасин” ёки “балетка” туфлилар билан кийиш ҳам тавсия этилмайди.

5-хато:Жинси шимни этик ичига киритиш

Бу мато анча дағал ва қалин бўлгани туфайли почасини этик ичига киритганда истаймизми, йўқми букланиб қолади. Горизонтал чизиқлар эса аёлнинг бўйини пастроқ кўрсатишига яна бир сабабдир. Сарвқомат кўриниш учун эса почаси кенг ёки классик бичимдаги шимларни кийиш тавсия этилади. Шунингдек, сони йўғон аёллар ёпишиб турувчи шимларни киймасликлари лозим.

САОДАТ тайёрлади.

Манба: “SUG‘DIYONA” газетаси