ҲОМИЛАДОРЛИКДА ТЎЛИШМАСЛИКНИНГ 8 ЧОРАСИ

— Турмушга чиққанимда 58 кг эдим. Бироқ ҳомиладорлик даврида жуда “эркаланиб” кетдим, шекилли, туғруққа олиб кириб кетишаётганида вазним 87 кг чиқди.Туғруқдан кейин ва эмизиш даврида эса озолмадим. Фақатгина болам 2 ёшга кирганида уни кўкракдан ажратиб, ўз ҳолимга қайтдим. ҳозир иккинчи фарзандимга ҳомиладорман, яна семириб кетишдан қўрқяпман. Менга бу борада тавсия бера оласизми?

Зилола, 25 ёш, Тошкент шаҳри

Бахтга тўла 9 ой давомида аёл 8-10 кг вазн тўплаши табий ҳол саналади. Агар тарози кўрсаткичи ундан ҳам кўпроғини кўрсатса, шифокор билан маслаҳатлашиш тавсия этилади. Негаки, ҳомиладор аёлни шишлар безовта қилаётган бўлиши мумкин. Вазн ҳар бир организмнинг ўзига хос жиҳати бўлиб,барчада ҳам бир хил ҳолат кузатимайди. Аммо ҳаммага бирдек фойдали тавсиялар мавжуд.

Нонушта қилинг!

Бўшқоронғулик ёки ҳомиладорликдан аввалги одатига кўра, аксарият аёллар нонушта қилишдан бош тортишади. Бу нотўғри! Кечки овқатдан кейин ва уйқу вақтида сиз камида 8–9 соат овқатланмаган бўласиз. Бу вақт давомида тана сарфлаган калорияларнинг ўрнини тўлдириш лозим. Акс ҳолда, тушлик вақтида керагидан кўп тамадди қилиб юборасиз.

Шахсий таомнома тузинг!

Бугун тушликка ёки кечки овқатга нима ейсиз? Агар билмасангиз, организм учун кераксиз шоколад ёки чипс истеъмол қилишингиз хавфи ошади. ҳомиладор аёлнинг иштаҳаси тушунарсиз бўлиб, истаган вақтда турли хил нарсаларни егиси келади. Агар қатъий таомномангиз бўлса, доим ёнингизда олма, майиз-ёнғоқ ва йогурт олиб юринг. ҳар эҳтимолга қарши...

Уйда овқатланинг!

Кафе, ресторан ва ошхоналарда овқатланишни камайтиринг. Таомлар хилма-хиллиги сизни қийнаб қўйиши билан бирга, у ерда керагидан кўп овқат еб қўясиз. Шунингдек, қаҳва ҳамда чой миқдорини камайтиринг (ҳомила учун керакли фолий кислотасини организмга сингдирмайди). Қорним дам бўлмасин, десангиз, газли ичимликлар ичманг!

Организмингизга қулоқ тутинг!

Қайнонагиз «икки киши учун овқатланинг» дейди, онангиз эса «яна бир бўлак хасипдан ол» деб ундайди. Эрингиз эса ҳаммадан беркитиб чўнтагида сиз учун шоколад олиб келади... Ана шундай қилиб, аста-секин ортиқча граммлар килограммга айланади. Керагидан ортиғини еманг! ҳомиладорлик даврида икки кишининг овқатини эмас, икки кишига фойда ва қувват бўладиган тамоларни истеъмол қилиш лозим.

Тақиқланган маҳсулотлар

Дудланган, аччиқ, шўр, нордон, ширин, газли, кремли ва ундан тайёрланган маҳсулотлар мумкин эмас! ҳар ҳолда уларнинг миқдорини камайтириш кераклиги аниқ. Имкон қадар табиий маҳсулотларни истеъмол қилинг. Биринчидан, ҳомила ва бўлажак она учун қадоқланган чипсдан кўра битта бодринг фойдали. Иккинчидан, эса семиртирмайди! Шишлар кузатилмаса, кунига 2 литрдан кам суюқлик ичманг.

Жисмоний машқларни чекламанг!

Ҳомиладорлик касаллик эмас! Агар сизнинг ҳолатингизда турли таъқиқлар бўлмаса, шифокор билан маслаҳатлашиб, ҳомиладорликдан аввал шуғулланиб юрган жисмоний машғулотларингизни давом эттиринг. Тоза ҳавода пиёда сайр қилинг. Ўтириб ишласангиз, ҳар соатда 5-10 дақиқа юришга ҳаракат қилинг.

Тунда овқатланманг!

Ҳомиладорлик ўзининг ирода кучини синаш даври эмас. Агар тунги соат 12:00 да қорнингиз очқаса, организмингиз талаби билан баҳслашманг. Бу вақтда илитма паловдан кўра, бир стакан илиқ сут, қатиқ ёки мева истеъмол қилишингиз мақсадга мувофиқ.

Оч юрманг!

Аввало ҳомилага зарар. Кейин қорнингиз узоқ вақт оч бўлса, ишатаҳангиз ҳам карнай бўлиб кетади. Кунига 5-6 марта оз-оздан овқатланинг. Нонушта, иккинчи нонушта, тушлик, толмас чой, кечки овқат ва уйқудан олдин бир стакан кефир — мана сиз учун тартиб! Унга риоя қилинг!

Дилноза МИРТОЛИПОВА

Манба: “SUG‘DIYONA” газетаси