— Тунда диққанафасликдан уйғониб кетаман. Ўрнимдан туриб, нафас оламан-да, кейин салгина тинчланаман. Қизиғи, кундузи ҳеч қандай безовталик бўлмайди. Нега шундай бўлаяпти, ҳайронман...
Анвар Тожиддинов, Тошкент вилояти
Нодира ҲАМРОЕВА, олий тоифали шифокор-терапевт:
— Нафас олишнинг қийинлашуви организмда кислород етишмаслиги, ўпка, юрак фаолияти ҳамда асаб қўзғалиши билан боғлиқ бўлиши мумкин. Диққат қилинг, агар нафас қисилиши юрак уришининг тезлашиши билан кечса, демак юрагингизни текширувдан ўтказиш лозим. Борди-ю, қуруқ йўтал ва кўкрак қафасида оғриқ кузатилса, ўпкангизни рентген таҳлилидан ўтказиш талаб этилади. Агар муаммо асабдан бўлса, худди юракда тугун тургандек сезги пайдо бўлади. Ўзингиздаги ўзгаришларни кузатинг-да, вақтни ўтказмай шифокор кўригидан ўтинг.
