— Қўл-оёқларим кундан-кун бўшашиб кетаяпти, дегач, отамни шифокорга олиб бордик. Текширтирсак, мушаклар сусайиши билан боғлиқ касаллик – миастения бошланган экан. Эшитишимча, хасталик ўта жиддий ва асоратлар мавжудлиги билан хавфли ҳисобланади. Муолажа қилинса, балки бундай бўлмас?
С.Ботиров, Андижон вилояти
Ойбек ПАРДАБОЕВ, шифокор-невролог:
— Миастения ёш танламайдиган аутоиммун хасталикдир. У ЎРВИ касалликларини оёқда ўтказиш, иммун тизимидаги бузилишлар, сурункали тарзда давом этган стресс сабаб юзага келиши мумкин. Миастения таъсирида организм, асаб- мушак постсиноптик мамбранаси бириктирув тўқимасининг ацетилхолин рецепторларига қарши антитаначалар ишлаб чиқара бошлайди.
Мушаклар кучини йўқотгач, сурункали чарчоқ ва ҳолсизлик бутун тана бўйлаб ёйилади. Хасталикнинг асосий белгилари: птоз (кўз қовоқларининг тушиб қолиши), кўз олди тасвирининг ўзгариши, талаффуздаги бузилишлар, чайнов мушакларининг сустлашиши, ютинишнинг қийинлашиши, бўйинда оғирлик, қўл-оёқларнинг кучсизланиши кабилардир.
Отангизга миастения ташхиси қўйилган бўлса, электромиография, антитаначалар таҳлили бўйича қон текшируви ҳамда МРТ ўтказилган бўлиши керак. Муолажа бошланишидан олдин тери остига прозерин юборилади. Унинг таъсирида вақтинчалик ижобий ўзгаришларга эришиш мумкин. Даволовчи шифокор буюрган дори воситалари тартиб билан қабул қилинишига эътибор беринг.
Миастения аниқланганидан кейинги даво чоралари касаллик ривожланишини тўхтатишга қаратилади. Бемор кўпроқ дам олиши, жисмоний ва руҳий зўриқишлардан сақланиши лозим.
Шунингдек, вақти-вақти билан артериал қон босимини ўлчаб туриш даркор, қуёшда кўп вақт юрмаслик ва билиб-билмай турли хил воситаларга мурожаат этиш эса ман этилади.
