— Бир ҳафта олдин қон таҳлили топширгандим, тиббий натижалар менда холестерин миқдорининг ортганини кўрсатди. Ҳозир даволанаяпман. Шифокор “ёмон холестеринни камайтириб, яхшисини ошириш керак, шунда атеросклероз хавфидан холи бўласиз”, деди. Ҳақиқатан ҳам шундайми? Яхши холестеринни қандай қилиб кўпайтираман, усуллари билан таништирсангиз?
Гавҳар Сотиболдиева, Самарқанд шаҳри
Нодира ҲАМРОЕВА, олий тоифали шифокор-терапевт:
— Холестерин – атеросклерозга олиб келувчи асосий омиллардан бири. Унинг миқдори қанчалик юқори бўлса, юракхасталикларининг келиб чиқиш эҳтимоли шунчалик ортади. Аммо холестерин билан курашишингиз атеросклероздан холисиз дегани эмас. Аслида қондаги холестерин хавфли эмас. “Душман”ингиз қон томир деворларида тўпланиб, зимдан ҳужумга шайланган холестерин тиқинларидир. Липидлар алмашинувидаги бошқа ўзгаришлар, масалан, қонда триглицеридлар миқдорининг юқорилиги ёхуд юқори зичликдаги липопротеин (холестерин ташувчи)нинг камлиги биргаликда кузатилса, атеросклекроз хавфи ортади. Шартли равишда холестерин иккига ажратилади: юқори зичликдаги липопротеид ва кам зичликдаги липопротеид. Юқори зичликдаги липопротеид бу яхши холестериндир. Кам зичликдагиси эса аксинча ёмони.Юрак касалликларига олиб келувчиси ҳам айнан шуниси. Нонуштани сариёғли бутербродсиз тасаввур қилолмайдиганлардан бўлсангиз, тез орада бу одат билан хайрлашишингизга тўғри келади. Биргина сариёғ истеъмолининг камайтирилиши 2-4 ҳафта давомида холестерин миқдорига кескин таъсир кўрсатади.
Ёғли сметана, қаймоқ, пишлоқ, тухумни ҳам “қора рўйхат”га киритган маъқул. Унинг ўрнига сояли маҳсулотларга диққат қилинг. Тамакидан ҳам аста-секинлик билан кўнгил узишга ҳаракат қилинг.
Ҳар кунлик ёғ балансини назорат қилинг. Ҳайвон ёғидан бутунлай воз кечганингиз яхши. Ўсимлик ёғлари (кунгабоқар, зайтун) эса ортиқча ташвиш келтирмайди.Ўсимлик ёғини салат ва егуликларга озроқ аралаштириш кифоя.
