Ўзбекистон Республикаси Президентининг “Террорчи гуруҳлар таркибига адашиб кириб қолган Ўзбекистон фуқароларини жиноий жавобгарликдан озод этиш тўғрисида”ги Фармонига кўра, озод этилган юртдошларимиз ўз оиласи, ота-онаси бағрида фаровонликдаҳаёт кечирмоқда.
Қашқадарёлик Жасур Каримов ҳам ана шундай диний оқим аъзоси бўлибқолганини ўзи ҳам билмай қолди. Балки, ўқувсизлиги ёки ишонувчанлиги бунга сабаб бўлгандир. Бунинг натижасида у диний оқим аъзолари рўйхатига тушиб қолади ва 5 йил давомида Россияда қочиб юради.
— Россияда юрган вақтим атрофимдагилар “Ўзбекистонга қайтсанг қамаб қўйишади, уйдагиларингни тинч қўйишмайди”, деб жуда қўрқитишарди, — дейди Жасур Каримов. – Мана қайтиб келдим, ҳеч ким ўзимни ҳам, оила аъзоларимни ҳам безовта қилишмаяпти. Ҳозирда ишга жойлашдим. Мана шундай буюк бахтни Президент берди. Бу ишончга садоқат билан ёндошишга ва Ватан корига ярайдиган содиқ фарзанд бўлишга ваъда бераман.
Давлат раҳбари Шавкат Мирзиёев таъкидлаганларидек, “Ислом фақат нурли ҳаётга, илм-маърифатга, яхшиликка ундайди. Ҳеч қачон хунрезлик, қотиллик, зўравонликка чақирмайди. Ана шу ҳақиқатни тан олмасдан, сохта ғояларга алданиб, зарарли оқимларга кириш, террорчи бўлиш – бу Ўзбекистон халқига мутлақо тўғри келмайди!”.
— Ёшлар иттифоқининг энг асосий вазифаларидан бири — диний оқимларга адашиб кириб қолган ёшларни тўғри йўлга бошлаш, касб-ҳунарга ўргатиш ва бандлигини таъминлашдан иборатдир,— дейди Ёшлар иттифоқи вилоят Кенгаши раиси Ш.Саттаров. — Шу мақсадда улар билан якка тартибда учрашувлар ташкил этиб келмоқдамиз. Бу каби учрашувларнинг ўтказилишидан асосий мақсад, ёшлар бандлигини таъминлаш, турли хилдаги жиноятларнинг олдини олиш, юртимиздаги тинчлик ва барқарорликни янада мустаҳкамлашдир.
Ёшлар иттифоқи Жасур Каримовга имтиёзли кредит олиб бермоқда. Мақсад уни жамиятнинг фаол аъзосига айлантириш!
Ҳа, давлатимиз, халқимиз меҳрибон. Хато қилганни кечириб, йиқилганни суяйди. Унга тўғри йўл кўрсатиб, қаддини тиклаб, қайтадан жамиятнинг фаол аъзосига айланишига имконият беради.
