3 апрел куни Ташқи иқтисодий алоқалар, инвестициялар ва савдо вазирлигида Швейцария Конфедерациясининг Ўзбекистон Республикасидаги Фавқулодда ва Мухтор Элчиси Николя Брюл билан учрашув бўлиб ўтди.
Суҳбат чоғида, икки мамлакат ўртасидаги савдо-иқтисодий, инвестицион ҳамда молиявий-техник ҳамкорликни кенгайтиришнинг истиқболлари муҳокама қилинди, дея хабар беради Вазирлик матбуот хизмати.
Асосий эътибор озиқ-овқат ва кондитер маҳсулотларини ишлаб чиқариш, мева-сабзавотларни чуқур қайта ишлаш, дори-дармонлар, шунингдек, боғдорчилик, ўсимликшунослик ва узумчилик соҳаларига тегишли бўлган аниқ лойиҳаларни амалга оширишга қаратилди.
Апрел ойининг охирида, Вазирликда молиявий-техник соҳасида ҳамкорликнинг янги йўналишларини муҳокама қилиш мақсадида “давра суҳбати” ўтказишга келишиб олинди.
Шунингдек, ўзбек томони, Швейцария вакилларини жорий йилнинг 5-6 июн кунлари Тошкент шаҳрида ”Ўзбекистонда озиқ-овқат дастурларини амалга оширишнинг муҳим йўналишлари” мавзусида бўлиб ўтадиган Халқаро конференцияда иштирок этишга таклиф қилди.
