Қайнона-келин ўртасидаги манфий муносабат бугун пайдо бўлгани йўқ, у жуда кўп йиллардан бери мавжуд. Фақат, муқаддам бу зиддиятлар оиланинг парокандалигигача, она қотилликка қўл уришигача етиб бормаган.
Пастдарғом туманидаги “Катта-найман” маҳалла фуқаролар йиғинида яшовчи Ойдин Суюнова оғир табиатлиги сабаб аввалига турмуш ўртоғи билан келишмаган. Шундан сўнг турмуш ўртоғи Эгамберди Турдиев қонуний никоҳни бекор қилиб, синглисининг уйида яшаш учун чиқиб кетган.
Аёлнинг 3 нафар келини билан доимий зиддиятлари сабаб хонадони маҳаллада нотинч оилалар рўйхатида турган. Кенжа ўғли Россия давлатига ишлашга кетган вақтлари унинг турмуш ўртоғи Севара Рўзимуродова ота онасиникида яшаб келган.
2017 йил 5 ноябрь куни кенжа ўғли Алишер Турдиев Россия давлатидан қайтиб келиб, турмуш ўртоғини уйига олиб келган. Шу шу қайнона келин ўртасидаги жанжаллар яна авж олган. Тергов жараёнида аниқланишича, Ойдин Суюнова келинига ўғлини бошқага уйлантиширишини ўғли ажралмаган тақдирда уларни биргаликда ёқиб юборишини айтиб келган.
2018 йилнинг 3 январь куни Ойдин Суюнова ўғли Алишер келини Севара ҳамда 5 яшар набираси Зилола ухлаб ётган вақтида уйига бензин сепиб ёқиб юборган. Алишер оғир даражадаги куйиш тан жарохати натижасида шифохонада вафот этган. Келини ва набираси ҳам куйиш жарохати туфайли ҳозир шифохонада.
Ушбу ҳолат юзасидан Пастдарғом туман прокуратураси томонидан Ўзбекистон Республикаси ЖКнинг 97-моддаси 1-қисми билан жиноят иши қўзғатилиб, тергов ҳаракатлари бошланган.
Мўътабар Нурмуҳаммедова
Махсус мухбир
