Malaysia Airlines авиакомпаниясига тегишли йўқолган Boeing қидирув ишлари вакиллари қидирув майдонини 75,4 дан 57,9 минг кв километрга қисқартиришди. Бу ҳақда Вести.ру сайти хабар бермоқда.
Океан тубидан самолётнинг “қора қути”си узатаётган сигнал қидирув майдонини қисқартириш имконини берди. Ушбу ҳудудда океан туби чуқурлиги 4,5 минг метр атрофида.
“Қидирув ишларини тўғри жойда олиб бораяпмиз, мен бунга ишонаман. Самолёт айнан шу ерда эканлигини тасдиқлаш учун биз самолёт ёки унинг бўлакларини ўз кўзимиз билан кўришимиз керак”,-дейди Австралия координацион қидирув маркази раҳбари Ангус Хьюстон.
Шунингдек, Хьюстон ушбу сигналлар техник қурилмалар томонидан узатиладиган сигнал эканлиги ва табиат билан боғлиқ эмаслигини ҳамда яқин келажакда самолёт ёки унинг бўлакларини топишга ишонч билдираётганини айтиб ўтди.
