Пойтахтимизда Кичик бизнес ва хусусий тадбиркорлик субъектларининг экспортини қўллаб-қувватлаш жамғармасининг йиғилиши бўлиб ўтди.
Унда Ўзбекистон Республикаси Ташқи иқтисодий алоқалар, инвестициялар ва савдо, Иқтисодиёт вазирликлари, Давлат божхона қўмитаси, «Ўзстандарт» агентлиги, суғурта компаниялари, тижорат банклари, кичик бизнес ва хусусий тадбиркорлик субъектлари вакиллари иштирок этди, дея хабар беради ЎзА.
Мамлакатимизда рақобатбардош маҳсулот ишлаб чиқариш ҳажми ва корхоналарнинг экспорт салоҳияти йилдан-йилга ошмоқда. Давлатимиз раҳбарининг 2013 йил 8 августда қабул қилинган “Кичик бизнес ва хусусий тадбиркорлик субъектлари экспортини қўллаб-қувватлаш борасидаги қўшимча чора-тадбирлар тўғрисида”ги қарори асосида ташкил этилган мазкур жамғарма тадбиркорлик субъектларининг ўз маҳсулотини ташқи бозорга чиқаришида яқиндан кўмаклашмоқда. Бу эса жаҳон андозаларига мос маҳсулот ишлаб чиқаришни рағбатлантириш, янги иш ўринлари яратишга хизмат қилмоқда.
Жорий йилнинг ўтган даврида жамғармага беш юз элликдан ортиқ тадбиркорлик субъекти маҳсулот ва хизматларни хорижга экспорт қилишда ёрдам сўраб мурожаат қилди. 450 га яқин мурожаат ижобий ҳал этилиб, тадбиркорларга ташкилий-ҳуқуқий, молиявий хизматлар кўрсатилди. Жумладан, 448 тадбиркорлик субъектига умумий қиймати 207,3 миллион АҚШ долларига тенг экспорт шартномалари тузишда кўмаклашилди.
2014 йилда корхоналарда сифат менежменти тизимлари (СМТ)ни жорий этиш мақсадида “Ўзстандарт” агентлиги билан ҳамкорликда ҳудудлардаги бир қатор корхоналар ўрганилди. Элликдан зиёд корхонада жамғарма молиявий кўмагида халқаро стандартларга асосан СМТни босқичма-босқич жорий этиш ишлари олиб борилмоқда.
Тадбирда жамғарманинг “Ўзбекинвест”, “Кафолат”, “Ўзагросуғурта” каби суғурта компаниялари билан биргаликда кичик бизнес ва хусусий тадбиркорлик субъектлари учун бир қатор енгилликларни ишлаб чиққани маълум қилинди. Хусусан, суғурта мукофоти тарифлари камайтирилди, экспорт шартномаларини суғурталашда суғурта мукофот тарифларини ҳисоблашнинг ягона услубий тизими ишлаб чиқилди.
Йиғилишда кичик бизнес ва хусусий тадбиркорлик субъектлари, фермер хўжаликларининг экспорт салоҳиятини ошириш, уларга янги бозорларга чиқиш, халқаро кўргазма ва ярмаркаларда иштирок этиш учун молиявий ёрдам кўрсатиш, рақобатбардош товарларни жаҳон бозорига етказиш юзасидан тавсиялар берилди.
