11 апрел куни Миллий матбуот марказида “Ўзбекинвест” экспорт-импорт миллий суғурта компаниясининг 20 йиллигига бағишланган матбуот анжуман бўлиб ўтди.
Матбуот анжуманини ўтказишдан мақсад компаниянинг суғурта бозорида 20 йиллик фаолият якунлари ва ривожланиш истиқболлари билан таништиришдан иборат бўлди.
“Ўзбекинвест” ЭИМСК бош директор ўринбосари Жамшид Ризаевнинг таъкидлашича, компания мамлакатимиз суғурта бозорининг қайта суғурта хизматларини ривожлантириш ташаббускори ҳисобланади, компания томонидан халқаро бозорда узоқ муддатли алоқалар ўрнатилиб, республикамиз суғурта соҳасига оид кўплаб қонун ҳужжатлар базасини ишлаб чиқишда фаол иштирок этмоқда.
“Ўзбекинвест” компанияси жаҳон тажрибаси асосида қўлланилиб келаётган 100 дан ортиқ суғурта маҳсулотларига эга. Компания тармоғи 14 та ҳудудий филиал ва 100 дан ортиқ шаҳар ва туман бўлинмаларини ўз ичига олиб, барча вилоят ва узоқ қишлоқ жойларда хизматларни кўрсатади.
2009-2013 йилларда компания томонидан йиғилган суғурта мукофоти ҳажмининг ўсиши 135%, қабул қилинган суғурта мажбуриятларининг ўсиши эса 142% ташкил этди.
2009 йилдан бугунга қадар компания томонидан тўланган суғурта тўловлари деярли 5 маротаба ошди. 2013 йил якунларига кўра, компаниянинг активлари ҳажмининг 2012 йилга нисбатан ўсиши 132 фоизни ташкил этди. Инвестицияларнинг 5 йил мобайнида 315 фоизга ўсди.
Компаниянинг асосий мақсадларидан бири бу кичик бизнес ва тадбиркорлик субъектларига суғурта хизматларини кўрсатишдан иборат. Бу соҳада оҳирги беш йил мобайнида йиғилган суғурта мукофотлари бўйича ўртача ўсиш 138%, имзоланган суғурта шартномалари бўйича 145% ташкил этди.
Ўзбекистон Республикаси Президенти томонидан 2014 йилга белгиланган иқтисодий дастурнинг амалга оширилишнинг энг муҳим устувор йўналишлари режалари доирасида, “Ўзбекинвест” компанияси устувор стратегик йўналишлари бўйича ўз ишини давом эттиради. Унга кўра, компаниянинг янги 25 та бўлинмалари очилиб, етиб бориш қийин бўлган узоқ қишлоқ жойларида суғурта хизматларини кўрсатиш ташкил этилади. Шунингдек, компания кичик бизнес ва хусусий тадбиркорлик ҳамда жисмоний шахсларга тақдим этилаётган суғурта хизматлари ҳажми кенгайтирилади.
