Дарья Домрачева Италияда ғолиб бўлди Италиянинг Антхольц-Антерсельва шаҳрида биатлон бўйича жаҳон кубогининг олтинчи босқичи якунланди.
Мазкур босқичнинг сўнгги пойгасида эркаклар ва аёллар масс-старт йўналишида куч синашди. Унда франциялик Мартен Фуркад барча рақибларини орта қолдириб мусобақа ғолибига айланган бўлса, норвегиялик Тарьей Бё ва Эрленн Бьёнтегор, иккинчи ҳамда учинчи ўринни эгаллади.
Аёллар ўртасида беларуслик Дарья Домрачева тўрт отишда биргина хатога йўл қўйган бўлса-да, маррага биринчи бўлиб етиб келди. Ундан 11.9 сония ортда қолган словакиялик Анастасия Кузмина иккинчи, финляндиялик Кайса Мякяряйнен эса учинчи поғонадан жой олди.
Жаҳон кубогининг умумҳисобида Кайса хотин-қизлар ўртасида 592 очко билан, Мартен Фуркад эса 834 очко билан биринчи поғонада бормоқда.
