Хабар бериб ўтганимиздек, Ўзбекистон Миллий олимпия қўмитаси ва мамлакат футбол федерацияси президенти Умид Аҳмаджонов Испания футбол федерацияси таклифига биноан айни кунларда расмий ташриф билан Мадридда бўлиб турибди.
Ташрифнинг биринчи кунида 1986 йилги жаҳон чемпиони, узоқ йиллар Мадриднинг “Реал” клубида Бош директор лавозимида ишлаган Хорхе Вальдано билан учрашган Умид Аҳмаджонов, кеча куниннг иккинчи ярмида “Сантьяго Бернабэу” стадионида “Реал” ва “Депортиво” клублари ўртасидаги учрашувни бевосита кузатиб борди. Ўйиндан сўнг ЎФФ раҳбари “Реал” клуби президенти Флорентино Перес, “Қироллик клуби” Бош директори Хосе Анхель Санчес, клубнинг ташқи алоқалар бўлими директори Эмилио Бутрагеньо, "Stellar group" агентлик компаниясининг Испания ва Португалия бўлими президенти Луис Алонсолар билан ҳам учрашишга муваффақ бўлди.
Испания футбол федерациясига ташриф буюрган Умид Аҳмаджонов жаҳон футболининг мозийдаги ёрқин юлдузларидан бири, хозирда Испания футбол федерациясининг техник директори Фернандо Йерро билан учрашиб, кўпгина масалалар бўйича келишувга эришди. Фернандо Йерро учрашув давомида Ўзбекистонда мукаммал ва замонавий футбол тизимини яратишда барча керакли ёрдамни кўрсатишга тайёр эканлигини айтиб ўтди. Бу энг аввало ЎФФ структурасида, терма жамоалар иш тизимида, клублар инфратузилмасида яққол намоён бўлади.
Шунингдек, ўзбекистонлик 16 ёшлик бир неча футболчилар ёзда Испанияга сафар уюштиришади ва маҳаллий клублар таркибида ўқув-машғулот йиғинларида иштирок этишади. Супер Лига клублари вакиллари эса мамлакатнинг гранд клублари “Реал” (Мадрид), “Барселона”, “Валенсия”, “Атлетико” (Мадрид) каби жамоаларида иш ўрганишади ва малакаларини ошириш имконига эга бўлишади. Бир сўз билан айтганда юртимизда испан футболи тизими жорий этилади. Болалар футболидан тортиб, терма жамоаларимизнинг тайёргарлик жараёнига қадар иш испан футболи модели асосида йўлга қўйилади.
ЎФФ раҳбари билан суҳбатда Йерро керак бўлса тегишли мутахассисларни Ўзбекистонга юбориш, мураббийларни ўқитиш, малакасини ошириш тизимини жорий этишда ҳам амалий ёрдам кўрсатишга тайёр эканлигини изҳор қилди. Учрашув чоғида жорий йилнинг март ойида Ўзбекистон футбол федерацияси делегацияси Испанияга сафар уюштириши ва мамлакат футбол федерацияси структураси, клубларнинг ишлаш тизими, терма жамоаларни мусобақаларга тайёрлаш механизми билан яқиндан танишишига келишиб олинди. Бу ҳақда Ўзбекистон Миллий олимпия қўмитаси матбуот хизмати маълум қилди.
