Ўзбекистон Республикаси Президенти Шавкат Мирзиёев жорий йилнинг 6 февраль куни «Кириш туризмини ривожлантириш чора-тадбирлари тўғрисида»ги қарорни имзолади. Ҳужжат матни "ЎзА"да тўлиқ келтирилган.
Унга кўра, «Ўзбекистон ҳаво йўллари» миллий авиакомпаниясига халқаро рейслар учун авиабилетларни таннархидан арзонроққа сотишга рухсат этилди.
Шунингдек, Ўзбекистон Республикаси Молия вазирлиги МАК билан биргаликда икки ой муддатда «Ўзбекистон ҳаво йўллари» МАКнинг солиқ солинадиган базасини арзонлаштирилган нархлар бўйича сотилган авиачипталар суммасига камайтириш механизмини жорий этиш топширилди.
