Наманган шаҳрида яшовчи А. Адашбоев эрталабдан ўзи ишлайдиган корхонага келиб, тош майдалагич ускунани юргизишдан олдин унинг соз-носозлигини кўздан кечира бошлади ва ногаҳон илғаш қийин бўлган оралиғида турган милтиққа кўзи тушди. Бу ҳақда ЎзА хабар берди.
Топилма «ИЖК» русумли ов милтиғи бўлиб, ёнида 7,62 миллиметр калибрли 5 дона ўқи ҳам бор эди. Қизиқиш билан ов қуролини аввал уйига олиб кетган А. Адашбоев маълум вақт ўтгач, чуқур фикр-мулоҳаза юритиб, ниҳоят тўғри қарорга келди.
У шаҳар ички ишлар бўлими бошлиғи номига ариза билан мурожаат қилиб, ов қуролини ўз ихтиёри билан топширди.
— Фуқаролар томонидан ўқотар қурол ва ўқ-дори воситалари ноқонуний сақланишининг олдини олиш борасида изчил олиб борилаётган тарғибот ва профилактика тадбирлари кутилган самарани бермоқда, — дейди Наманган шаҳар ИИБ инспектори Д. Ғозиев. — Ноқонуний сақланаётган қуролларни ўз ихтиёри билан олиб келиб топширган шахс тегишли тартибда жавобгарликдан озод этилаётгани одамларни бу борада тўғри йўл тутишга ундамоқда.
