Апрель ойида чўкиб кетган “Севол” кемасининг 4 нафар экипаж аъзоларига қасддан бўлмаган қотиллик айблови қўйилди, дея хабар бермоқда Ренхап.
Ушбу қарорни прокурорлар кема капитани, унинг икки ёрдамчиси ҳамда юзлаб йўловчиларни эвакуация қилмаган кема бош муҳандисига нисбатан чиқаришди.
Эслатиб ўтамиз, бортида 476 киши бўлган “Севол” йўловчи кемаси 16 апрель куни ҳалокатга учраган. Уларнинг кўп қисми Чежудо оролига саёҳатга отланган мактаб ўқувчилари бўлган.
Ҳозирга қадар 281 кишининг жасади топилган, 23 кишининг тақдири номаълумлигича қолмоқда, омон қолганлар сони 172 нафарни ташкил қилди.
Кема ҳалокати юзасидан жиноий иш очилган, 20 нафарга яқин киши полиция томонидан қўлга олинган. Терговчилар берган маълумотларга кўра, капитан йўловчи қиёфасида чўкаётган кемани биринчилардан бўлиб тарк этган. Бундан ташқари, йўловчилар кема экипажи одамларни эвакуация қилишнинг ўрнига уларни ўз жойларида қолишга чақиришганини айтишмоқда.
