Актриса Ситора Фармонова бундан 3-4 йил илгари сайтларнинг бири қилган туҳмат туфайли “запрет”га учрагани ҳақида очиқча гапириб ўтди...
— Эркин ижод қилолмаётганимдан депрессияга тушиб қолдим. Ваҳоланки, кунора экранларда кўринавермайман, тадбирлару теле-радиолойиҳаларга ҳам чақиришса бораман, бўлмаса йўқ, бироқ қайсидир маънода ижодим чегаралангани жуда қаттиқ таъсир қилди.
Ўзим учун кўп нарсаларни билдим, ўша пайтлари қариндошларим орасида ҳам юзимга кулиб туриб, «Сизни «запрет»га туширишибдими» деганлари бўлди. Ҳол-аҳволингизни сўраб, «Шундай бўлибди» деган қайда-ю, кулиб туриб «ўйиб» олиш қайда. Ижтимоий сайтлардан бирининг ноҳақ айблови ҳам номимни булғади: «Ситора Фармонова «КВН» ўйинларида ўзбек миллатининг устидан кулди! Шунинг учун лицензиясини олиб қўйишди», дея. Агар мен шундай иш қилганимда, бу аллақачон ижтимоий тармоқларга тарқаб кетган бўлмасмиди? Бунинг устига, нега мен ўз миллатимни кулгуга оламан, бу менга нима учун керак? Ўша сайтни дея қанча ҳақорат эшитдим, ҳатто пўписа қилганлар мени тузини еб тузлуғига тупурганликда айблаганлар ҳам бўлди. Номимни оқлайман, ноҳақ гап қилишганини исботлайман деб Россиянинг «Биринчи канали» раҳбариятидан «КВН»даги ҳар бир саҳна чиқишининг монтаж қилинмаган ва тайёр нусхаларини ёздириб олдим. Ижтимоий сайтга жойланган видеотасмаларни йиғдим, мақсадим ўша сайтни судга бериш эди. Негаки «Ўзбекконцерт» уюшмасининг тақиққа тушириши мени «КВН»да иштирок этишим билан боғлиқ эмасди. Аммо продюссерим мени судлашишдан қайтарди. «Яна гап қилишади, судма-суд юрибди. Сизга шов-шув керакми», дея.
— Сизга туҳмат қилганларни кечирдингизми?
— Йўқ, кечирмайман! Ҳар нарсанинг жавоби бор, шунчаки уларнинг ноғорасига ўйнаганим йўқ. Кутдим ва номим оқланишига ишондим. Шукр, бугун юзим ёруғ!
