Нусратулло Аҳмедов ҳамда Одина Раҳмоналиеванинг никоҳ тўйига қатнашган маҳаллаларда ва оилаларда ижтимоий-маънавий муҳитни ўрганиш ҳамда аниқланган муаммоларни бартараф этишга кўмаклашиш бўйича ташкил этилган Республика ишчи гуруҳи вакиллари шундай фикрга келишди.
Поп туманидаги “Олмазор” маҳалласида яшовчи Баҳодир Аҳмедов ҳамда Эргашали Раҳмоналиев фарзандларининг тўйини, гарчи иқтисодий имкониятлари етса-да, бугунги талабларга мос равишда ортиқча дабдабалардан ҳоли ихчам ўтказдилар, деб ёзади ЎзА.
Сўнгги пайтларда келин уйида ўтказилиши урфга айланган “қизлар базми” бўлмади. Тўй куни наҳор оши ўтказилмади. Аввалги 10-12 та қимматбаҳо хориж автомобил кортежлари ўрнига ўзимизда ишлаб чиқарилган замонавий 2 та енгил машина ёшларни тўйхонага олиб келди. Даврада ўйнаганларга камида 100 тача бериладиган латта-лутта ёки бирор бир совға – “саргардон” деган одатга йўл қўйилмади. Дастурхон ҳам камтарона безатилди. Спиртли ичимликлар тортилмади. Маҳаллий санъаткор ҳам ўзаро келишув асосида арзон нархда хизмат қилди. “Бирровчи”лар таклиф этилмади.
Бир кечалик тўйдан миллионлар тежаб қолинди. Хўш, бу пул янги қурилган оила иқтисодиётига кирса, ёш келин-куёвнинг кейинги эҳтиёжларига ишлатилса, кимга фойда. Аввало уларнинг ўзларига. Зеро, тўй дегани бу ҳали оилавий ҳаёт эмас, унинг бошланиши демакдир. Барча ресурсларни бир кунлик тадбирга ишлатиб қўйиб, кейин аттанг қилиш ярамайди.
Қувонарлиси, ихчам тўй афзалликларини ота-оналар, айниқса, аёлларимиз тушуниб етишмоқда.
– Қудалар билан келишган ҳолда келин олиб келадиган мебеллардан воз кечдик, – дейди йигитнинг онаси Муҳаррам Эргашева. – Тўйдан кейин тежаладиган пуллардан фарзандларимизнинг ўзлари олишар. 4 нафар фарзандимиз бор. Нусратулло учинчи ўғлим. Бу гал тўй анча енгил ва осон ўтди. Менга келиннинг бойлиги эмас, оқилалиги керак. Бахт моддий бойликда эмас, маънавий бойликда.
– Фарзандларимизнинг кўзларидаги қувончини кўриб, бошим осмонга етди, – дейди қизнинг онаси Орзихон Мирзаҳмедова. – Ўзим узоқ йиллар ўқитувчи бўлиб ишлаганман. Бир ўғлим, икки қизим бор. Яширмайман, пенсиянинг чўғи баланд эмас. Катта қизимизни узатаётганимизда ёр-биродарлардан анча қарз кўтаргандик. Узоқ вақт умримиз қарз тўлаш билан ўтди. Бу галги тўйни ўтказишда бемалол ўзимизнинг қурбимиз етди. Бунинг учун. Аввало, Юртбошимизга раҳмат, одилона сиёсат олиб бораяптилар.
Шу куни тўй кечки соат 16:00дан, 19:00гача давом этди.
