Шу кунларда Россиянинг Санкт-Петербург шаҳрида бокс бўйича нуфузли “Губернатор кубоги” мусобақаси бўлиб ўтмоқда.
Кеча мусобақада ярим финал жанглари ўтказилиб, финалга йўл олган боксчилар номи маълум бўлди. Ярим финалда рингга чиққан 10 нафар чарм қўлқоп устамиздан 7 нафари ғалабага эришиб, финал чиптасини қўлга киритишди, деб хабар бермоқда Оламспорт нашри.
Ҳамюртларимиздан Рио Олимпиадаси чемпионлари Ҳасанбой Дўсматов россиялик Умед Бобоженовни, Шаҳобиддин Зоиров қирғизистонлик Сирожиддин Абдуллаевни, Миразиз Мирзаҳалилов россиялик Бахтовар Назировни, Шунқор Абдурасулов қозоғистонлик Адлет Курметовни, Исроил Мадримов беларуслик Виталий Бондаренкони, Бектемир Мелиқўзиев россиялик Андрей Косенковни, энг оғир вазндаги Баҳодир Жалолов эса яна бир мезбон боксчиси Илья Квасниковни мағлубиятга учратди.
Жасурбек Латипов қозоғистонлик Азат Махметовга, Иқболжон Холдоров россиялик Павел Фёдоровга, Санжар Турсунов эса яна бир рус боксчиси Муслим Гаджимагомедовга имкониятни бой бериб, халқаро турнирнинг бронза медали билан тақдирланишди.
Финал жанглари бугун ўтказилади:
-49 кг: Ҳасанбой Дўсматов - Батор Сагалуев (Россия)
-56 кг: Шаҳобиддин Зоиров - Миразиз Мирзаҳалилов
-60 кг: Шунқор Абдурасулов - Алберт Батыргазиев (Россия)
-75 кг: Исроил Мадримов - Глеб Бакши (Россия)
-81 кг: Бектемир Мелиқўзиев - Георгий Кушиташвили (Россия)
+91кг: Баҳодир Жалолов - Владислав Муравин (Россия)
