Сингапурлик келишилган ўйинлар ташкилотчиси Уилсон Раж Перумал 1994 йил Хиросимадаги Осиё ўйинлари финал учрашувида Хитой ўйинни атайлаб бой берганини айтмоқда. Бу ҳақда Stadion.uz сайти хабар беради.
Ҳозирги кунда ҳибсда сақланаётган Уилсон Раж Перумал ўз хотираларини қоғозга тушириб, италиялик журналистлар Алессандро Риги ва Эммануэле Пиано ҳамкорлигида “Келишув қироллари” номи остида китоб чоп этган. Китобда 1994 йили Хиросимада бўлиб ўтган Осиё ўйинлари финали - Хитой - Ўзбекистон ўйини ҳам эслаб ўтилган.
У ўз китобида Хитой-Ўзбекистон учрашуви олдидан таниш букмекерлардан бирига қўнғироқ қилганини ва у Хитойга пул тикишни маслаҳат берганини ёзган. Бир соатдан сўнг, букмекер қайта қўнғироқ қилиб, Хитойга эмас, Ўзбекистонга пул тикишни маслаҳат берганини эслаган. “Кеча Хитой фаворит эди, эрталабгача ҳамма нарса бирдан ўзгарди, бу эса келишилган ўйиннинг аниқ белгиси”,-деди Перумал.
Эслатиб ўтамиз, учрашувда Ўзбекистон Хитой устидан 4:2 ҳисобида ғалаба қозонган. Ўйинда Игорь Шквирин, Сергей Лебедев, Азамат Абдураимов, Шуҳрат Мақсудов гол киритишган.
Stadion.uz сайтининг қайд этишича, Перумалнинг бу гаплари қанчалик тўғри ёки нотўғрилигини айтиш қийин.
“Кимнидир ўйинни сотганлик ёки сотиб олганликда айблашдан ҳам йироқмиз. Перумалнинг гаплари рост бўлган тақдирда, Хитой финал ўйинини букмекерларга сотган деган хулосага бориш мумкин, яъни бу ишга ўзбекистонлик футболчиларни алоқаси бўлмаган. Перумал ҳозирги кунда Финляндияда, қамоқхонада сақланмоқда. Интерпол эса тергов суриштирув ишларини давом эттиряпти”,-дейилади хабарда.
