Абдулазиз Комилов Ҳиндистон ташқи ишлар давлат вазирини қабул қилди

СИЁСАТ 17.09.2018, 09:56
Абдулазиз Комилов Ҳиндистон ташқи ишлар давлат вазирини қабул қилди

Ўзбекистон ташқи ишлар вазири Абдулазиз Комилов Ўзбекистонга амалий ташриф билан келган Ҳиндистон ташқи ишлар давлат вазири Мобашар Javaд Акбарни 16 сентябрь куни қабул қилди. Бу ҳақда Ўзбекистон ТИВ матбуот хизмати хабар бермоқда.

Ўзбекистон Президенти Шавкат Мирзиёевнинг Ҳиндистонга бўлажак ташрифи ва Ҳиндистон раҳбарияти билан бўладиган музокараларига тайёргарлик кўриш жараёни учрашув кун тартибининг асосий масаласи бўлди.

Ҳозирги вақтда икки мамлакатда ҳам олий даражадаги Ўзбекистон—Ҳиндистон учрашувининг мазмуний қисми устида биргаликда ишлар олиб борилаётгани қайд этилди. Сиёсий, савдо-иқтисодий, маданий-гуманитар соҳада қатор муҳим тадбирлар ўтказилмоқда.

Шу ўринда 13—14 сентябрь кунлари Самарқанд шаҳрида бўлиб ўтган «Ҳиндистон — Марказий Осиё» мулоқотининг 5-мажлисида иштирок этган Мобашар Javaд Акбар таъкидлашича, икки томонлама муносабатлар учун жуда муҳим ҳодиса арафасида шу каби тадбирларнинг ўтказилиши катта аҳамият касб этади.

Август ойида бўлиб ўтган Савдо-иқтисодий ва илмий-техникавий ҳамкорлик бўйича ҳукуматлараро комиссиянинг 11-мажлисида икки томон учун ҳам манфаатли бир қатор истиқболли қўшма лойиҳаларни амалга ошириш бўйича аниқ келишувларга эришилди.

Бир неча кун илгари Ҳиндистонда Ўзбекистон маданияти кунлари муваффақиятли ўтказилди. Нью-Деҳли шаҳрида бўлиб ўтадиган «Ўзбекистонда ишлаб чиқарилган» миллий маҳсулотлар кўргазмаси ва қўшма бизнес-форумга тайёргарлик кўрилмоқда.

Суҳбат давомида халқаро ва минтақавий сиёсатнинг баъзи масалалари юзасидан ҳам фикр алмашилди. Учрашувда Ҳиндистон элчиси Винод Кумар ҳам иштирок этган.

Шарҳлар

Об-ҳаво: Тошкент
Валюта курси
1