Маълум қилинишича, аэропорт терминали 30 йилдан ортиқ вақтдан буён фаолият юритиб келмоқда ва бугунги кунда унинг ўтказувчанлик қуввати ҳамда хизмат кўрсатиш имкониятлари замонавий талабларга тўлиқ жавоб бермай қолган.
Шу боис парвозлар географиясини кенгайтириш, иқтисодий фаоллик ва сайёҳлар оқими ўсишига мос равишда инфратузилмани комплекс ривожлантириш режалаштирилган. Тақдимотда учиш-қўниш йўлагини узайтириш ва кенгайтириш, аэродромни модернизация қилиш, янги йўловчи ва юк терминаллари барпо этиш масалалари кўриб чиқилди.
Майдони 20 минг квадрат метр бўлиши кутилган янги йўловчи терминали соатига 1,2 минг нафаргача йўловчига хизмат кўрсатиш қувватига эга бўлади. Қўшимча самолёт тураргоҳлари барпо этилиб, ҳаво кемаларини сақлаш имконияти 10 тагача етказилади.
Янги терминалда кенг кутиш заллари, замонавий сервис нуқталари, қулай рўйхатдан ўтиш ва назорат тизимлари, шунингдек, юқори мартабали меҳмонлар учун алоҳида хизмат кўрсатиш шароитлари яратилиши кўзда тутилган.
Давлат раҳбари аэропорт ҳар қандай ҳудуднинг “дарвозаси” эканини таъкидлаб, замонавий сервисни йўлга қўйиш ҳамда ёндош хизмат тармоқларини ривожлантириш бўйича тавсиялар берди. Лойиҳани халқаро стандартлар асосида хорижий операторлар иштирокида амалга ошириш муҳимлиги қайд этилди.
Маълум қилинишича, лойиҳа амалга оширилса, Фарғона водийсида транспорт боғлиқлиги кучайиб, сайёҳлар оқими ортиши ва ҳудуднинг логистик марказ сифатидаги мавқеи мустаҳкамланиши кутилмоқда. Президентнинг Фарғона вилоятига ташрифи якунланиб, давлат раҳбари Тошкентга қайтди.
