1993 йили Жаҳон чемпиони унвонини қўлга киритган россиялик хоккейчи Валерий Карпов 10 октябрь куни 43 ёшида вафот этди.Бу ҳақда www.dni.ru нашри хабар бермоқда.
2014 йилнинг июль ойида у шахсий ҳаётидаги баъзи келишмовчиликлар туфайли бош қисмидан жароҳат олганди. Унинг бошига шиша идиш билан берилган зарбдан сўнг, у зинадан йиқилган. Ушбу ҳодисадан кейин хоккейчи Челябинскадаги касалхоналарнинг бирига, нейрожарроҳлик бўлимига етказилган. Олинган жароҳат юзасидан шифокорлар Карповнинг бош қисмида икки марта жарроҳлик амалиётини ўтказишди, бироқ у ўзига келмай кома ҳолатида бир неча ой тўшакка михланиб қолди.
Бугун, 10 октябрь кунихоккейчи Валерий Карпов хушига келмаган ҳолатда вафот этди. Эслатиб ўтамиз, 1994 йили у миллий терма жамоа билан у Лиллехаммердаги Олимпиадада 4 ўринга сазовор бўлган. 2002 йили эса яна бир жаҳон чемпионатида кумуш медални қўлга киритган. Хоккейчи ҳаётининг сўнгги йилларида “Автомобилист” клуби менежери вазифасида ишлаган. Янги мавсумда у “Челмета” мураббийлар штабига кириб, хужумчилар билан ишлаши керак эди.
