Microsoft корпорациясининг асосчи ҳамкорларидан бири Пол Аллен 65 ёшида вафот этди, дея хабар берди ТАСС нашри.
Маълумотларга кўра, Аллен узоқ давом этган саратон касаллиги туфайли ҳаётдан кўз юмган. Аввалроқ у нехожкин лимфома (НХЛ) касаллигидан даволанаётгани хабар қилинганди. Microsoft ҳамасосчиси 2009 йилда касалликнинг ривожланиб кетиши олдини олишга муваффақ бўлган эди.
Маълумот учун, 1975 йилда Билл Гейтс ва Пол Аллен Альбукерке шаҳарчасида Microsoft компаниясига асос солишган. 1976 йилда Нью-Мехико штатининг округ котибиятида янги савдо белгиси рўйхатга олинган. Forbes журналининг 2015 йилги маълумотларига кўра, Аллен дунёдаги энг бой одамлар рўйхатида 51-ўринни эгаллаган.
