Ўзбек қизларини Покистонга сотиб келган жиноий гуруҳ қўлга олинди

ЖИНОЯТ 20.11.2018, 10:37
Ўзбек қизларини Покистонга сотиб келган жиноий гуруҳ қўлга олинди

Йиллар давомида ўзбек қизларини хорижга сотиб келган яна бир жиноий гуруҳ қўлга олинди. Гуруҳга бошчилик қилиб келган Гулюз Юсупова (мақоладаги исм–шарифлар ўзгартирилди) Ўзбекистон Республикаси ЖКнинг 135-моддаси, 3-қисми, «г» бандида назарда тутилган жиноятни содир этганликда айбдор деб топилди.

Тўрт аёл ва алданган қиз

Маълум бўлишича, Гулюз Юсупова 2011 йилнинг ёз ойи ўрталарида Дилноза Пиримқулова, Зулфия Юсупова, Сурайё Акромова ва дастлабки терговда шахсини аниқлаш имкони бўлмаган номаълум кимсалар билан ўзаро тил бириктириб, жиноий гуруҳ тузган. Ушбу гуруҳ қизларни алдов йўли билан хорижга олиб чиқиш ва у ерда фоҳишаликка мажбурлаш билан шуғулланган.

Суд ҳужжатидан: Гулюз Юсупова 1982 йилнинг ноябрь ойида Тошкент шаҳрида туғилган. Маълумоти ўрта, турмушидан ажрашган, бир нафар вояга етмаган фарзанди бор. Муқаддам судланмаган.

Одам савдоси билан илк маротаба шуғулланаётган бўлса-да, Г.Юсупова гуруҳни қандай бошқариш кераклигини яхши билган. У ҳар бир гуруҳ аъзосига аниқ вазифа белгилаб, ишни шахсан ўзи назорат қилган. Шунга кўра, гуруҳ аъзолари З.Юсупова ва С.Акромова Ўзбекистон Республикаси фуқароларини алдов йўли билан Покистон Ислом Республикасига жўнатиш учун масъул бўлишган. Дастлабки терговда шахсини аниқлаш имкони бўлмаган кимсалар гуруҳ раҳбари томонидан юборилган пуллар ҳисобига ёлланган шахсларни Қозоғистон Республикаси ва Туркия давлатида кутиб олиб, Покистонга ўтиб олишларини назорат қилишган.

Покистоннинг Карачи шаҳрида қизларни кутиб олиш, уларни жойлаштириш ва кейинчалик фоҳишалик билан шуғулланишга мажбурлаш вазифаларини шахсан гуруҳ раҳбари Гулюз Юсупова ва гуруҳ аъзоси Дилноза Пиримқуловабажариб келган.

2011 йилнинг июль ойида уюшган гуруҳ хорижда ишлаб, пул топишни мақсад қилган фуқаро – Ойдин Холматовани ўз «қарамоғига» олади. Г.Юсупова қизни Покистонга юбориши ва у ерда кийим–кечак фабрикасига ишга жойлашишга ёрдам беришини айтиб, ишонтиради.

Ойдин Холматова дастлабки терговда шахсини аниқлаш имкони бўлмаган кимсалар юборган пул ҳисобидан Қозоғистонга етказилади. У ердан гуруҳ раҳбари томонидан тайинланган «одам» қизни Туркиянинг Истанбул шаҳрига юборади. Покистонга етиб келганида эса уни Гулюз Юсупова ва Дилноза Пиримқулова кутиб олишади.

Бутун парвоз давомида фабрикада ишлаб пул топишни, оиласига ёрдам беришни хаёл қилган О.Холматова алданганини билганида кеч бўлганди. Г.Юсупова дастлабки терговда шахсини аниқлаш имкони бўлмаган кимсалар раҳнамолигида қизнинг паспортини олиб қўйиб, унинг эркинлигига дахл қилади. Ва 2013 йилнинг 30 июнига қадар фоҳишалик билан шуғулланишга мажбурлайди.

Жиноят ишлари бўйича Сергели тумани судининг 2014 йил 15 апрелдаги ҳукмига кўра, судланувчилар Д.Пиримқулова ва З.Юсупова ЖКнинг 135-моддаси, 3-қисми, «г» банди билан айбли деб топилиб, иккисига ҳам тегишли жазо тайинланган.

Шалола билан танишув

Содир этган жинояти учун жазо олиши муқаррар бўлган Гулюз Юсупова судда ўзигақўйилган айбловни мутлақо инкор этди.

Гулюз Юсупова:

— 2008 йил апрель ойида танишим Фарида Оқилова билан бирга Покистон Ислом Республикасининг Лохор шаҳрига етиб келдик. Аэропортда бизни Жамила исмли озайбайжонлик аёл кутиб олди ва Карачидаги Шалоланинг уйига олиб борди. У ерда мен Дилноза Пиримқулова ва озарбайжонлик Парвина исмли қиз билан танишдим. Суриштирсам, қизлар Шалоланинг уйида фоҳишалик билан шуғулланишар экан.

Судланувчининг кўрсатмасида айтилишича, Шалола қизларга имконият берган, яъни унинг розилиги билан Г.Юсупова ва бошқалар мижозларнинг уйига бориб, фоҳишалик билан шуғулланишлари мумкин бўлган.

Г.Юсупова фоҳишалик билан шуғулланганини яширмади. Аммо уюшган гуруҳга раҳбарлик қилганини, одам савдосига аралашганини инкор этди.

Гулюз Юсупова:

— Онам билан телефон орқали гаплашиб турардик. Галдаги суҳбатларимиздан бирида у менга Ойдин исмли қиз ҳақида айтиб қолди. «У ҳам Покистонга кетмоқчи, ишлаб пул топмоқчи. Аммо йўл харажатлари учун маблағийўқ» дея ёрдам беришимни сўраган онамдан қиз билан интернет орқали гаплаштиришини сўрадим.

Судланувчи кўрсатмасини давом эттириб, Ойдин Холматова билан онлайн мулоқот қилгани, ундан илгари фоҳишалик билан шуғулланганми-йўқми, суриштирганини сўзлаб берди. Айтишича, О.Холматова бу «иш»дан хабари борлигини, авваллари Дубай ва Туркия давлатларида мижозларга интим хизмат кўрсатиш билан шуғулланганини маълум қилган.

Гулюз, Ойдин ҳақида Шалолага хабар бергач, у қиз билан скайп орқали гаплашади. Сўнг йўл харажатларини тўлиқ ўз зиммасига олиб, уни Покистонга келтиради.

Гулюз Юсупова:

— Ойдин, Шалола билан қандай шартлашган, билмайман. Мен ундан ҳеч қандай моддий манфаат кўрмадим. Ишлаб топган пулларимни Шалолага топшириб, ўзаро келишувимизга кўра, ўзимга тегишли қисмини олдим ва 2012 йил, июль ойида Тошкентга қайтдим.

Судланувчи Г.Юсупова бир неча бор Тошкентга келиб-кетган. Ҳар сафар Покистонга қайтганида Шалола билан учрашган ва унинг қўлида фоҳишалик билан шуғулланишни давом эттирган. 2014 йилнинг февраль ойларида Г.Юсупова Ўзбекистон Республикасида қидирувда эканидан хабар топади. Аммо шунга қарамай, фаҳш ишлар билан шуғулланишда давом этади.

Суддаги кўрсатмасида Г.Юсупова 2017 йилнинг январь ойига қадар Шалоланинг қўлида фоҳишалик билан шуғулланганини айтади. 2017 йилнинг 27 октябрь санасида Лохор аэропорти орқали Ўзбекистонга қайтган маҳали ҳужжатларини чегара назорати ходимлари текширишади ва унинг қидирувдаги шахс экани маълум бўлади.

Гулюз Юсупова ЖКнинг 135-моддаси, 3-қисми, «г» бандида назарда тутилган жиноятни содир этганликда айбли деб топилди. Унга саккиз йил озодликдан маҳрум қилиш жазоси тайинланди.

Ўзбекистон Республикаси Олий суди

ҳамда жиноят ишлари бўйича Сергели туман суди судьяси

Музаффар Кукиев билан ҳамкорликда тайёрланди

Шарҳлар

Об-ҳаво: Тошкент
Валюта курси
1