PROlogue IV халқаро кинофестивалининг иккинчи куни ҳам кино ихлосмандлари учун маънавий озуқа берадиган лойиҳалар, турли маҳорат дарслари, қисқа метражли фильмлар танловлари билан қизғин давом этмоқда.
Айниқса, режиссёр Қамара Камалованинг ҳаёти ва ижодига бағишланган “Кино – унинг иши” (Кино – её работа) китобининг тақдимоти санъат оламига кириб келаётган ёш ижодкорлар учун чинакам маънодаги маҳорат дарсига айланиб кетди.
“Кино – унинг иши” (Кино – её работа) китобига киритилган материалларнинг аксарияти киношунос Елена Чайканинг режиссёр Қамара Камалованинг яратган фильмлари ҳақида ёзган мақолаларидан олинган.
Қамара Камаловани кўпчилик юртдошларимиз яхши танийди.
Ўзбекистонда хизмат кўрсатган санъат арбобининг “Аччиқ данак”, “Ўзганинг бахти”, “Эртага чиқасанми?”, “Бўлмаган нарса ҳақида”, “Ёввойи”, “Атроф оппоқ қор билан қопланган” каби бадиий фильмлари халқимиз қалбидан жой олган.
Ижодкор услубининг ўзига хос жиҳати шундаки, у миллийликни сақлаган ҳолда ўз фильмларини яратади.
Китоб тақдимотида Қамара Камалова яратган фильмларда рол ижро этган актёр ва актрисалар, режиссёрнинг шогирдлари ва кино ихлосмандлари иштирок этишди.
- PROlogue фестивали юртимизда бир неча йиллардан буён ўтказиб келинади. Лекин бу гал биринчи марта халқаро миқёсда бўлиб ўтмоқда. Биласизми, бундай фестиваллар, мастер класслар ёшлар, ижодкорлар учун озуқа ҳисобланади. Шунинг учун бу имкондан фойдаланиб қолиш керак. Бугунги тақдимот мени устозим, онажонимдек қадрли инсон, ўзбек киносининг ардоқли ва атоқли режиссёри Қамара Камалова билан учраштириб, кино оламидаги қадамларимни яна бир бор эслатди. 9-синфда ўқиётган вақтимда “Атроф оппоқ қор билан қопланган” фильмида дебют ролимни ижро этганман. Мен бу инсондан миннатдорман. Чунки улардан кино соҳаси бўладими, ҳаёт тажрибасими, хуллас, жуда кўп нарсаларни ўрганганман ва ўрганиб келмоқдаман, - дейди Ўзбекистонда хизмат кўрсатган артист Раъно Шодиева.
Ҳақиқатан ҳам, Ўзбекистон ёшлар иттифоқи ҳамда Ёш ижодкорлар кенгаши томонидан тайёрланиб, нашр этилган “Кино – унинг иши” номли китоб кинодаги катта авлодга бўлган ҳурматнинг яна бир намойиши бўлди.
Шу куннинг ўзида Ёшлар ижод саройида Қамара Камалованинг “Йўл бўлсин” номли фильмининг ретроспектив намойиши ҳам бўлиб ўтди.
- Мени кино оламида Қамара Камалова “дунёга келтирган” бўлса, Аюб Шаҳобиддинов “катта қилган”, - дейди ёш актёр Азиз Раметов. - Мен Қамара Камалова режиссёрлигидаги “Йўл бўлсин” фильмидаги ролим билан кино дунёсига кириб келдим. Бугун бу фильм намойиш этилди. Ёшлар томоша қилди. Лекин кўпчилик охиригача ўтирмади. Томошабинларни “Бу қанақа кино ўзи, умуман тушунмадим” қабилидаги гаплари қулоғимга чалинганда, тўғриси, хафа бўлиб кетдим. Албатта, бу фильмни тушуниш учун озгина бўлса-да, ақл керак. Чунки “Йўл бўлсин” фильми рамзий маънога эга. Лекин қачонгача томошабинни ўйлаб, унинг йўриғига юриб, бачкана, фақат маиший мавзуларни акс эттирган киноларни оламиз?! Улар ҳам ақлини ишлатсин, ўйлансин, кино руҳияти билан яшаб, унинг мазмунини ўзи чақиб олсин. Бежизга бундай фестиваллар ташкил этилаётгани йўқ. Уларни ўтказишдан мақсад ҳам, аслида, ҳақиқий санъат асарлари билан ёшларни таништиришдан иборат.
PROlogue фестивали доирасидаги тадбирлар давом этади.
