Жанубий Кореянинг Инчеон шаҳрида ўтказилаётган ПараОсиё ўйинларида мамлакатимиз спортчилари делегациямиз ҳазинасини олтин медаллар билан бойитишда давом этмоқдалар.
Енгил атлетиканинг 4х100 метр масофага югуриш (Т11-13) бўйича ўтказилган мусобақаларда Ватанимиз шарафини ҳимоя қилган ҳамюртларимиз Миран Сахадов, Дониёр Солиев, Улуғбек Чориев ва Фахриддин Ҳамроев тўртлиги энг юқори натижани (44:25 сония) қайд этиб, ПараОсиё ўйинларининг 21 олтин медалини делегациямиз ҳисобига ёзиб қўйдилар. Мазкур мусобақада Таиланд жамоаси иккинчи (44:26 сония), Индонезияликлар эса учинчи (46:66 сония) ўринни эгаллашди.
Шу тариқа, енгил атлетикачиларимиз томонидан қўлга киритилган медаллар сони 12 тага етди (7 та олтин, 3 та кумуш, 2 та бронза).
Шу ўринда таъкидлаш жоизки, “ПараОсиё-2014” ўйинларининг сузиш мусобақаларида иштирок этган юртдошларимиз Кирилл Паньков (4 та) ва Дмитрий Хорлин (3 та) жами 7 та олтин медалга сазовор бўлишган бўлса, дзюдо усталаримиз жами 9 та медални (7 та олтин, 1 та кумуш, 1 та бронза) қўлга киритдилар.
Айни дақиқаларга келиб Ўзбекистон делегацияси ҳисобида 21 та олтин, 4 та кумуш, 3 та бронза медали мавжуд ва ҳамюртларимиз умумжамоа ҳисобида 41 давлат орасида 5-ўринда боришяпти.
Эслатиб ўтамиз, 2010 йили Гуанчжоу (Хитой)да бўлиб ўтган ПараОсиё ўйинларида ҳамюртларимиз 1 та олтин, 2 та кумуш, 3 та бронза медалига сазовор бўлишган.
