Давлат божхона қўмитаси Контрабанда ва божхона қонунчилиги бузилишига қарши курашиш бошқармаси ходимлари Тошкент вилояти божхоначилари билан ҳамкорликда рангли металларнинг ноқонуний савдосига қарши тезкор тадбир ўтказди.
Унда Тошкент шаҳрида фаолият олиб борувчи МЧЖларнинг бири ўз таркибида ноқонуний цех ташкил қилгани фош этилди. Яширин цехда сифати кафолатланмаган алюминлардан қозонлар ясалиши йўлга қўйилгани аниқланди. МЧЖнинг вакили фуқаро Т.Б. томонидан цехда тўпланган 53,2 миллион сўмлик 13 тонна алюмин ашёвий далил сифатида олинди.
Шунингдек тадбир давомида мамлакатимиздаги яна бир МЧЖларнинг бири таркибида ташкил қилинган ноқонуний цех фаолиятига нуқта қўйилди. Унда МЧЖ директори фуқаро Н.Р. бошчилигида тўпланган умумий қиймати 10 миллион сўмлик 2,5 тонна металл парчалари ашёвий далил сифатида олинди.
Олинган металл парчалари “Ўзиккиламчиранглиметалл”га топширилиб, ҳолат юзасидан божхона текширувлари давом эттирилмоқда.
