Ўзбекистонлик оғир атлетикачи Руслан Нуриддинов Қозоғистоннинг Олма-Ота шаҳрида бўлиб ўтаётган жаҳон чемпионатида 105 килограмм вазн тоифасидаги атлетларнинг силтаб кўтариш баҳсларида иккинчи бўлди. Бу ҳақда OlamSport.com хабар бермоқда.
Аввалроқ, Руслан Нуриддинов даст кўтаришда 193 килограмм натижа кўрсатиб (2013 йилга нисбатан 3 килограмм яхши кўрсаткич), олтин медални қўлга киритган эди.
Бироқ, силтаб кўтариш учун баҳсларда мусобақа мезбони – қозоғистонлик Илья Ильин кучлироқ чиқди. Нуриддинов учинчи уринишда 239 килограмм оғирликка буюртма берди ва унди кўтарди, рақиби Ильин эса учинчи уринишда 242 килограмм тошни ўзига бўйсундирди.
«Икки кураш якунига кўра, ҳар икки спортчининг натижаси тенглашиб қолди. Бундай вазиятда атлетларнинг шахсий вазн тоифаларига мурожаат қилинади. Бу борада Ильин (104,35) Руслан (104,78)дан 43 граммга енгилроқ бўлиб чиқди», – дейилади OlamSport.com хабарида.
Эслатиб ўтамиз, Руслан Нуриддинов 2013 йили Польшада бўлиб ўтган жаҳон чемпионатида даст кўтаришда 190, силтаб кўтаришда 235 килограмм натижа кўрсатиб, жаҳон чемпионига айланган эди.
Шундан сўнг у Ўзбекистон Президенти фармонига асосан «Ўзбекистон ифтихори» фахрий унвони билан тақдирланган, шунингдек, унга ҳукумат томонидан Chevrolet Cobalt автомобили тақдим этилган эди.
