Каталониянинг «Барселона» футбол клуби аргентиналик ярим ҳимоячиси Лионель Месси Ole газетасига берган интервьюсида жамоани тарк этиши мумкинлигига ишора қилди. Бу ҳақда Reuters ахборот агентлиги хабар бермоқда.
Келажак режалари ҳақидаги саволга жавоб бераркан, Месси асосий эътиборни бугунги кунга қаратишни маъқул кўришини ва омадсиз чиққан 2013/2014 йилги мавсумдан сўнг «Барселона» билан янги совринларни қўлга киритишни исташини айтиб ўтди.
«Шундан кейин кўрамиз», – дея қўшимча қилди Месси, «Бутун фаолиятингизни «Барселона»да ўтказишни режалаштиряпсизми?», қабилида берилган саволга жавоб бераркан.
«Футболда вазият жуда тез кескин ўзгариб кетиши мумкин. Мен ҳар доим «Барселона»да абадий қолишни хоҳлашимни айтиб келган бўлсам-да, баъзи нарсалар сен хоҳлагандек бўлавермайди», – деди Месси.
Кетиш қарори унинг ўзидан чиқадими ёки бу бошқа бировнинг ҳукми билан амалга ошадими, қабилидаги саволга аргентиналик футболчи шундай жавоб берди: «Мен бу ҳақда кўп маротаба гапирганман. Агар ҳаммаси менга боғлиқ бўлганида – мен ҳар доим шу ерда қолган бўлардим».
Агар ҳақиқатан ҳам 27 ёшли «Барселона»дан кетадиган бўлса, унинг трансфери жаҳон рекордига айланиши мумкин – баъзи ҳисоб-китобларга кўра, футболчининг трансфер баҳоси 100 миллион евро (125 миллион доллар)дан ортиқ.
