Ўзбекистон Республикаси Олий Мажлиси Сенати Раисининг биринчи ўринбосари Содиқ Сафоев 18 май куни Россия Федерацияси Федерал Мажлиси Федерация Кенгаши Раиси ўринбосари Ильяс Умаханов раҳбарлигидаги делегация билан учрашди.
Учрашувда парламентлараро ҳамкорликни янада мустаҳкамлаш, жумладан, халқаро парламент тузилмалари доирасида алоқаларни фаоллаштириш масалалари муҳокама этилди.
Томонлар икки мамлакат парламентлари ўртасидаги муносабатлар янги босқичга кўтарилганини таъкидлади. Зеро, демократик жамиятни ривожлантиришда, икки мамлакатнинг ҳам сиёсий, ҳам ижтимоий-иқтисодий ҳаётидаги ислоҳотларини амалга оширишда парламентнинг роли ва аҳамияти тобора ошиб бормоқда.
2018 йил ноябрда Ўзбекистон парламенти делегацияси Россияга ташриф буюрган эди. Ташриф доирасида Ўзбекистон Республикаси Олий Мажлиси Сенати ва Россия Федерацияси Федерал Мажлиси Федерация Кенгаши ўртасида ҳамкорлик тўғрисида битим имзоланган, шунингдек, иккала мамлакат парламентларининг ҳамкорлик бўйича комиссияси мажлиси ўтказилган эди. Ҳозирги вақтда Сенат ва Федерация Кенгашининг икки томонлама ҳамкорлигини ривожлантириш бўйича тадбирлар босқичма-босқич амалга оширилмоқда.
Россия парламенти аъзолари халқаро сиёсий майдонда Ўзбекистоннинг фаоллигини қайд этди. Ўзбекистон Президентининг Россия билан Ўзбекистон ўртасидаги икки томонлама, жумладан, парламентлараро муносабатларни ривожлантиришга қўшаётган улкан ҳиссаси алоҳида эътироф этилди.
Эслатиб ўтамиз, Сенатдаги учрашувда қатнашган россиялик сенаторлар 19 май куни Тошкентда бўлиб ўтадиган Москва Давлат халқаро муносабатлар институти битирувчиларининг V халқаро форумида ҳам иштирок этади.
